Pokistonda har yili suv toshqinlari takrorlanmoqda. Bu yilgi yomg‘irlar mamlakatning deyarli barcha hududlarini, jumladan, Panjob poytaxti Lahorni ham zararladi. BMT ma’lumotiga ko‘ra, uch oy ichida mingdan ortiq kishi halok bo‘lgan, 6,9 milliondan ziyod aholi esa tabiiy ofatdan jabr ko‘rgan. Minglab uylar vayron bo‘lgan, million gektardan ortiq ekin maydonlari suv ostida qolgan.
Mutaxassislar bu holatni global iqlim o‘zgarishi bilan bog‘lashmoqda. Pokiston dunyoda issiqxona gazlari chiqindilarining atigi 1 foizini ishlab chiqsa-da, iqlim o‘zgarishining eng og‘ir oqibatlarini boshidan kechirmoqda. Shimoliy tog‘larda joylashgan muzliklar tez erib, kuchli sel va to‘satdan toshqinlarni keltirib chiqarmoqda. Bu esa butun qishloqlarni suv ostida qoldirib, yo‘llar va infratuzilmani vayron qilmoqda.
Janubiy hududlarda ham vaziyat og‘ir. Panjob viloyatida uchta daryo — Sutlej, Ravi va Chenab — bir vaqtda toshib, 4,500 ga yaqin qishloq suv ostida qoldi. Minglab odamlar uysiz qoldi, yuz minglab bola va ayollar ochiq havoda yashashga majbur bo‘ldi. Qishloq joylarda tibbiy yordam yetishmasligi tufayli homilador ayollar va bolalar eng ko‘p aziyat chekmoqda.
Hukumat va xalqaro tashkilotlar ogohlantirish tizimlarini yaxshilashga urinmoqda, biroq aholining ko‘pchiligi hanuz xavfli hududlarda yashamoqda. Ular suv qaytganidan so‘ng ham o‘z uylariga qaytishga majbur, chunki boradigan boshqa joylari yo‘q.
“Zamin”ni Telegramʻda oʻqing!
