Lukashenko va AQSH vakili Minskda tinchlik muzokaralari bo‘yicha uchrashdi

Minsk shahrida navbatdagi diplomatik muloqot: Belarus prezidenti Aleksandr Lukashenko va AQSH prezidentining Rossiya va Ukraina bo‘yicha maxsus vakili Kit Kellog Mustaqillik saroyida muhim uchrashuv o‘tkazdi. Belta davlat agentligining ma’lum qilishicha, suhbat samimiy va ochiq ruhda o‘tgan.

Aleksandr Lukashenko uchrashuv avvalida so‘zga chiqib, “Janob general, siz bilan uchrashganimdan juda xursandman. Umid qilamanki, suhbatimiz juda samimiy va ochiq bo‘ladi. Aks holda, uchrashuvdan nima foyda? Agar biz bir-birimiz oldida aqlli va ayyor bo‘lsak, natijaga erisholmaymiz”, deya ta’kidladi.

Kit Kellog esa “biz juda xavfli va murakkab davrda yashayapmiz, agar dono va adolatli bo‘lmasak, inqirozlar keskinlashishi mumkin”, deb javob qaytardi.

Lukashenko qo‘shimcha qilib: “Men sizga va’da beramanki, Belarus hududida to‘liq xavfsizlik ta’minlanadi va bu vaqt ichida na Belarusda, na atrof-muhitimizda keskinlashuv bo‘lmaydi”, deya e’tirof etdi.

Uchrashuvning boshqa jihatlari oshkor qilinmadi. Biroq, xalqaro kuzatuvchilar va Reuters manbasiga ko‘ra, mazkur muloqot Rossiya va Ukraina o‘rtasidagi boshi berk ko‘chaga kirib qolgan tinchlik muzokaralarini qayta jonlantirish uchun yangi imkoniyat sifatida baholanmoqda.

Shu bilan birga, Kit Kellog so‘nggi yillarda Belarusga tashrif buyurgan eng yuqori martabali AQSH rasmiysiga aylandi. 2020 yilda Davlat kotibi Mayk Pompeo Minskka kelgan edi — bu 1993 yildan beri AQSHning bunday darajadagi ilk rasmiy tashrifi bo‘lgan. AQSHda siyosiy hokimiyat almashganidan so‘ng va, ayniqsa, 2022 yilda Rossiyaning Ukrainaga keng ko‘lamli bosqinidan keyin, Bayden ma’muriyati Minskdagi AQSH elchixonasi faoliyatini to‘xtatdi va Belarus–AQSH munosabatlari yangi bosqichga o‘tdi.

Belarusdagi prezidentlik saylovi, ommaviy noroziliklar va mamlakatdagi qatag‘onlardan so‘ng, Vashington rasmiy siyosati sezilarli o‘zgardi. Shu sabab, Kit Kellog tashrifi xalqaro maydonda katta diqqat markaziga aylandi.

Minskdagi mazkur uchrashuv tinchlik muzokaralarini qayta tiklash yo‘lida muhim qadam bo‘lishi mumkin. Muzokara natijalari va uning Yevropa xavfsizligiga ta’siri borasida tahlilchilar va jamoatchilik katta qiziqish bilan kuzatmoqda. “Zamin”ni Telegramʻda oʻqing!