G‘azo sektorida davom etayotgan qurolli mojaro fonida, Hamas harakati o‘z bayonotida qurollarini topshirishga tayyor emasligini ma’lum qildi. Harakatning ta’kidlashicha, faqat mustaqil va suveren Falastin davlati tashkil topgan taqdirdagina qurolsizlanishga rozilik beriladi.
Bu bayonot Isroil tomonidan ilgari surilgan asosiy talab – Hamasning qurolsizlanishiga ochiq javob sifatida baholanmoqda. So‘nggi haftalarda Qatar va Misr vositachiligida olib borilgan bilvosita muzokaralar natijasiz yakunlangan edi. Muzokaralar 60 kunlik o‘t ochishni to‘xtatish va garovga olinganlar bo‘yicha kelishuvga erishishni maqsad qilgan edi.
Fransiya va Saudiya Arabistoni tomonidan ilgari surilgan ikki davlatli yechim tashabbusi Qatar va Misr tomonidan qo‘llab-quvvatlandi. Ushbu tashabbusga ko‘ra, Hamas qurollarini G‘arb tomonidan qo‘llab-quvvatlanayotgan Falastin Muxtoriyatiga topshirishi kerak. Ammo Hamas bu talabni rad etdi. Harakat bayonotida shunday deyiladi:
“Qurolli qarshilik – bu bizning tabiiy huquqimiz. Bu huquqdan faqat to‘liq mustaqil va poytaxti Quddus bo‘lgan Falastin davlati tashkil topgach voz kechish mumkin.”
Hamas 2007-yildan beri G‘azo ustidan siyosiy va harbiy nazoratni saqlab kelmoqda, biroq 2023-yil 7-oktabrida sodir etilgan hujumdan keyin Isroil tomonidan boshlangan keng ko‘lamli urush natijasida harakat jiddiy yo‘qotishlarga uchradi.
Isroil Bosh vaziri Benyamin Netanyaxu avvalroq bergan bayonotida Falastin davlatining tashkil topishini rad etgan va bunday davlat Isroil xavfsizligiga tahdid solishini ta’kidlagan edi. Netanyaxu, shuningdek, Birlashgan Qirollik va Kanada kabi mamlakatlarning Falastin davlatini tan olish rejasini keskin tanqid qilib, bu qarorni Hamasga mukofot sifatida baholagan.
7-oktabr voqealaridan so‘ng boshlangan urush natijasida hozirga qadar 60 mingdan ortiq falastinlik halok bo‘ldi. G‘azo infrastrukturasining katta qismi vayron bo‘lgan, millionlab aholi esa insonparvarlik inqiroziga yuz tutgan.
So‘nggi muzokaralarning muvaffaqiyatsiz yakunlanishi tomonlar o‘rtasidagi chuqur kelishmovchiliklar, xususan, Isroil harbiy kuchlarining G‘azodan qaytarilishi va xavfsizlik nazorati kabi masalalar hal etilmay qolayotganini ko‘rsatmoqda.
“Zamin”ni Telegramʻda oʻqing!
