Xitoy hukumati Afrika davlatlari bilan savdo-iqtisodiy aloqalarni yanada mustahkamlash maqsadida muhim qaror qabul qildi. Unga koʻra, Pekin Afrikaning aksariyat mamlakatlari uchun import bojlarini toʻliq bekor qilganini eʼlon qildi.
Mazkur imtiyoz deyarli barcha Afrika davlatlarini qamrab oladi. Faqatgina Tayvan bilan diplomatik aloqalarni saqlab qolgan Esvatini ushbu preferensiyadan mustasno etilgan.
Maʼlumotlarga koʻra, Xitoy avvalroq — 2024 yil dekabr holatiga koʻra, Afrikaning eng kam rivojlangan 33 ta davlati uchun bojxona toʻlovlarisiz savdo rejimini joriy qilgan edi. Endilikda esa bu imkoniyat kengaytirilib, jami 53 ta mamlakatni oʻz ichiga olmoqda.
Mutaxassislarning taʼkidlashicha, ushbu qaror Afrika davlatlarining eksport salohiyatini oshirish, ularning iqtisodiy rivojlanishini qoʻllab-quvvatlash hamda Xitoy bilan savdo hajmini sezilarli darajada kengaytirishga xizmat qiladi.
Shuningdek, ushbu bojxona imtiyozlari 2028 yilning 30 apreliga qadar amal qilishi belgilangan. Bu esa uzoq muddatli hamkorlik uchun mustahkam asos yaratadi.
Kuzatuvchilarga koʻra, Xitoyning bu qadami nafaqat iqtisodiy, balki geosiyosiy jihatdan ham muhim ahamiyat kasb etadi.
“Zamin”ni Telegramʻda oʻqing!
