Rossiyada yana bir jinoiy holat yuzasidan o‘zbekistonlik fuqaro tilga olinmoqda. 31 yoshli O‘zbekiston fuqarosi 45 yoshli erkakning o‘limiga sababchi bo‘lganlikda gumon qilinmoqda. Bu haqda Sankt-Peterburg va Leningrad viloyati Ichki ishlar bosh boshqarmasi rasmiy ma’lumot berdi.
Dastlabki ma’lumotlarga ko‘ra, voqea joriy yilning 25 aprel kuni kechki payt Sverdlov nomidagi posyolkada sodir bo‘lgan. Ikki erkak o‘rtasida kelib chiqqan keskin tortishuv qisqa fursatda mushtlashuvga aylanib ketgan. Janjal yakunida ishtirokchilardan biri voqea joyidan qochib ketgan, ikkinchisi esa yerda harakatsiz holda qolgan.
Hodisaning guvohi bo‘lgan shaxs darhol tegishli xizmatlarga murojaat qilgan. Voqea joyiga yetib kelgan tez tibbiy yordam xodimlari erkak allaqachon vafot etganini tasdiqlagan.
Huquq-tartibot organlari bergan ma’lumotga ko‘ra, marhum 45 yoshli erkak bo‘lib, Tver viloyatida yashagan. Uning tanasida, xususan, o‘ng chakka qismida jiddiy jarohat aniqlangan. Mutaxassislar aynan shu zarba o‘limga sabab bo‘lgan bo‘lishi mumkinligini taxmin qilmoqda.
Dastlabki surishtiruvlarga qaraganda, mojaroning sababi ayol kishiga bog‘liq bo‘lishi ehtimoldan xoli emas. Shaxsiy munosabatlar fonida kelib chiqqan kelishmovchilik keskin tus olib, fojiali yakun topgan.
Mazkur holat yuzasidan jinoyat ishi qo‘zg‘atilgan. Tergov organlari voqeani “og‘ir tan jarohati yetkazish oqibatida ehtiyotsizlik bilan o‘limga sabab bo‘lish” moddasi bilan baholamoqda.
Gumonlanuvchi tezkor tadbirlar natijasida o‘sha posyolkadagi 1-makrorayon hududida, 45-uy yaqinida qo‘lga olingan. Aniqlanishicha, u 31 yoshli O‘zbekiston fuqarosi bo‘lib, doimiy ish joyiga ega emas.
Hozirda tergov harakatlari davom etmoqda. Huquqni muhofaza qiluvchi organlar voqeaning barcha tafsilotlarini aniqlash, shuningdek, mojaroning asl sabablarini to‘liq o‘rganish ustida ish olib bormoqda.
“Zamin”ni Telegramʻda oʻqing!
