Ғазо секторида давом этаётган қуролли можаро фонида, Ҳамас ҳаракати ўз баёнотида қуролларини топширишга тайёр эмаслигини маълум қилди. Ҳаракатнинг таъкидлашича, фақат мустақил ва суверен Фаластин давлати ташкил топган тақдирдагина қуролсизланишга розилик берилади.
Бу баёнот Исроил томонидан илгари сурилган асосий талаб – Ҳамаснинг қуролсизланишига очиқ жавоб сифатида баҳоланмоқда. Сўнгги ҳафталарда Қатар ва Миср воситачилигида олиб борилган билвосита музокаралар натижасиз якунланган эди. Музокаралар 60 кунлик ўт очишни тўхтатиш ва гаровга олинганлар бўйича келишувга эришишни мақсад қилган эди.
Франция ва Саудия Арабистони томонидан илгари сурилган икки давлатли ечим ташаббуси Қатар ва Миср томонидан қўллаб-қувватланди. Ушбу ташаббусга кўра, Ҳамас қуролларини Ғарб томонидан қўллаб-қувватланаётган Фаластин Мухториятига топшириши керак. Аммо Ҳамас бу талабни рад этди. Ҳаракат баёнотида шундай дейилади:
“Қуролли қаршилик – бу бизнинг табиий ҳуқуқимиз. Бу ҳуқуқдан фақат тўлиқ мустақил ва пойтахти Қуддус бўлган Фаластин давлати ташкил топгач воз кечиш мумкин.”
Ҳамас 2007-йилдан бери Ғазо устидан сиёсий ва ҳарбий назоратни сақлаб келмоқда, бироқ 2023-йил 7-октабрида содир этилган ҳужумдан кейин Исроил томонидан бошланган кенг кўламли уруш натижасида ҳаракат жиддий йўқотишларга учради.
Исроил Бош вазири Бенямин Нетаняху аввалроқ берган баёнотида Фаластин давлатининг ташкил топишини рад этган ва бундай давлат Исроил хавфсизлигига таҳдид солишини таъкидлаган эди. Нетаняху, шунингдек, Бирлашган Қироллик ва Канада каби мамлакатларнинг Фаластин давлатини тан олиш режасини кескин танқид қилиб, бу қарорни Ҳамасга мукофот сифатида баҳолаган.
7-октабр воқеаларидан сўнг бошланган уруш натижасида ҳозирга қадар 60 мингдан ортиқ фаластинлик ҳалок бўлди. Ғазо инфраструктурасининг катта қисми вайрон бўлган, миллионлаб аҳоли эса инсонпарварлик инқирозига юз тутган.
Сўнгги музокараларнинг муваффақиятсиз якунланиши томонлар ўртасидаги чуқур келишмовчиликлар, хусусан, Исроил ҳарбий кучларининг Ғазодан қайтарилиши ва хавфсизлик назорати каби масалалар ҳал этилмай қолаётганини кўрсатмоқда.
«Замин»ни Telegram’да ўқинг!
