Homiladorlar necha marta skrining tekshiruvlaridan oʻtishi zarur?

^{Foto: Sogʻliqni saqlash vazirligi}
Homiladorlikning dastlabki uch oyi — ham ona, ham tugʻilajak farzand salomatligi uchun oʻta mas'uliyatli davr. Shu sababli ushbu muddatda ayollarning tegishli tibbiy tekshiruvlardan oʻz vaqtida oʻtishi gʻoyatda muhim. Bu orqali homilada tugʻma va irsiy kasalliklar rivojlanishining oldi olinadi.

Xoʻsh, homilador ayollar qanday skrining tekshiruvlaridan oʻtishi zarur?

Toshkent shahar 4-son tugʻuruq kompleksi bosh shifokori oʻrinbosari Zarina Egamova shu haqda ma'lumot berdi.

— Prenatal, ya'ni tugʻuruqqacha skrining yordamida homilaning sogʻligini baholash va genetik kasalliklar rivojlanish xavfini aniqlash mumkin, — deydi mutaxassis. — Bundan koʻzlangan asosiy maqsad chaqaloqlarning tugʻma nuqsonlar va irsiy (xromosom) xastaliklar bilan tugʻilishining oldini olishdan iborat.

Homilador ayollar ikki bosqichdan iborat boʻlgan prenatal skrining tekshiruvlaridan oʻtkaziladi.

Birinchi bosqichda boʻlajak onalar ommaviy ultratovush tekshiruvi bilan qamrab olinadi. Shu asnoda homilasida tugʻma nuqsonlar aniqlanganlar “xavf guruhi”ga kiritiladi. Bunday tekshiruvlar uch marta tuman (shahar) markaziy koʻp tarmoqli poliklinikalarining prenatal skrining xonasida amalga oshiriladi.

Ilk tekshiruv homiladorlikning 10-14 haftasida, ikkinchi marta 16-20 haftasida, uchinchi marta esa 28-32 haftasida tugʻma nuqsonlarni aniqlash va homilaning funktsional holatini baholash uchun oʻtkaziladi.

Birinchi bosqich tekshiruvi xulosasiga koʻra “xavf guruhi”ga kirgan ayollar qanday yoʻl tutadi?

Ular homiladorlikning 16-20 haftasida Respublika ixtisoslashtirilgan ona va bola salomatligi ilmiy-amaliy tibbiyot markazining Ona va bola skrining boʻlimi hududiy filiallarida ikkinchi bosqichdagi prenatal tekshiruvlardan oʻtkaziladi. Bunda ayol ushbu muassasaga poliklinikadan yoʻllanma hamda avvalgi prenatal ultratovush tekshiruvlari natijalari aks etgan tibbiy kartasidan koʻchirmani olib boradi.

Bu erda ultratovush, biokimyoviy skrining tekshiruvi va uning natijasiga muvofiq homilaning xromosom sindromlar bilan tugʻilish xavfi yuqori boʻlganda, invaziv tekshiruv (xorionbiopsiya, platsentotsentez, kordotsentez) usullari, keyinchalik esa homila hujayralarining genetik tahlili hamda boshqa koʻriklar oʻtkaziladi.

Ikkinchi bosqichdagi prenatal skrining natijasida boʻlajak onaga tibbiy-genetik xulosa beriladi.

Homilada tugʻma rivojlanish nuqsonlari va irsiy (xromosom) kasalliklar mavjud boʻlganda, ayol tibbiy-genetik xulosa bilan tegishli poliklinikaga yuboriladi. Ushbu xulosa koʻrib chiqish uchun tuman (shahar) koʻp tarmoqli markaziy poliklinikalarining Tibbiy-maslahat komissiyasiga taqdim etiladi.

Komissiya homilador ayol va uning yaqin qarindoshlariga prenatal skrining tekshiruvlari natijalari, aniqlangan tugʻma rivojlanish nuqsonlari va buning kelgusidagi oqibatlari, davolash usullari hamda bu bilan bogʻliq xavf-xatarlar darajasi, qoʻllash mumkin boʻlgan tibbiy muolajalar va ularning samaradorligi haqida toʻliq axborot beradi.

Shundan keyingina homilador ayol va uning yaqin qarindoshlari oʻzlariga ma'qul qarorni qabul qiladi.

Shu ma'noda, boʻlajak onalar homiladorlik davrida har bir tekshiruvdan oʻz vaqtida oʻtishga jiddiy ahamiyat qaratishi lozim. “Zamin” yangiliklarini “Telegram”da kuzatib boring