2025 yilning dastlabki to‘qqiz oyida Toshkent shahri sudlarida nikohni bekor qilish bo‘yicha 6,7 mingta murojaat ko‘rib chiqildi, deb UPL.uz xabar berdi. Bu ko‘rsatkich 2024 yilning shu davriga nisbatan 468 taga ko‘p. Shunga qaramay, ushbu da’volarning 3 mingtasi qanoatlantirilgan, 3,7 mingta holatda esa turmush o‘rtoqlar yarashib, oila saqlanib qolgan.
Ajralish bo‘yicha ishlar Toshkentdagi umumiy fuqarolik da’volarining 26,8 foizini tashkil qilgan. Sudya Jasur Sirojevning ma’lumotiga ko‘ra, sudlar tomonidan yarashuv muddati berish va boshqa choralar natijasida ko‘plab oilalar buzilishdan saqlanib qolgan.
Bu holat butun mamlakat bo‘yicha ham kuzatilmoqda. Oliy sud ma’lumotiga ko‘ra, 2025 yilning yanvar-sentyabr oylarida 52 mingdan ortiq ajralish bo‘yicha ishlar sudlarga kelib tushgan. Ulardan 27 578 tasi rasman ajralish bilan yakunlangan, 18 430 tasi rad etilgan. Statistika qo‘mitasiga ko‘ra, shu davrda 35,4 mingta oila ajrashgan bo‘lib, bu o‘tgan yilga nisbatan 4,1 foizga ko‘pdir.
Ajralishlar sonini kamaytirish maqsadida davlat tomonidan tizimli choralar ko‘rilmoqda. Sudlar turmush o‘rtoqlarga yarashish uchun muhlat berish amaliyotini faol qo‘llamoqda. Da’vo rad etilgan hollarda ish materiallari oilalar bilan ishlash bo‘limlariga yuboriladi.
Prezident Shavkat Mirziyoyev bu masalaga alohida e’tibor qaratmoqda. U jamiyatda nikoh shartnomalarini tuzishni targ‘ib qilish va aholining huquqiy savodxonligini oshirish zarurligini ta’kidlagan. Davlat rahbariga ko‘ra, bu chora oila va ayniqsa, farzandlar uchun og‘ir oqibatlarning oldini oladi.
“Zamin”ni Telegramʻda oʻqing!
