Ijtimoiy tarmoqlarda muhokama markazida bo‘lgan holat bo‘yicha bloger va tadbirkor Sanjar Karimov (tanilgan taxallusi “Sanjik”) kutilmagan qaror qabul qildi. U aldov bilan sotib olingan deb hisoblangan uyni bolalar uyiga ixtiyoriy ehson sifatida topshirdi. Bu haqda bloger o‘zining Instagram sahifasida ma’lum qildi.
Sanjikning ta’kidlashicha, jamoatchilikning ko‘p qismi voqeaga faqat shov-shuv nuqtayi nazaridan yondashmoqda, ammo hech kim jabrlanuvchiga amaliy yordam ko‘rsatishni taklif etmayapti.
“Biz kattalar va ulamolar bilan maslahatlashib, uyni bolalar uyiga topshirish haqida qaror qildik. Davlat nomiga notarial tartibda ehson sifatida hadya etamiz. Bu hammamiz uchun saboq bo‘lsin”, — dedi bloger.
Uning so‘zlariga ko‘ra, har yili ehson va zakot berib keladi va 2025 yil uchun shu uyni bolalar uyiga topshirish orqali xayr-ehson qilishni ma’qul ko‘rgan.
“Yetim bolalarga boshpana va mehr kerak. Ular ham baxtli yashashga haqli”, — dedi Sanjik.
Mutaxassislar bu qarorni ijtimoiy mas’uliyatning yorqin namunasi sifatida baholamoqda.
“Zamin”ni Telegramʻda oʻqing!
