Bugun butun futbol olamining e’tibori Ispaniyaga, xususan "Real Madrid"va "Barselona" klublari o‘rtasidagi tarixiy to‘qnashuv — "El-Klassiko"ga qaratilgan. La Liganing navbatdagi turi doirasidagi bu uchrashuv har doimgidek katta qiziqish va intriga bilan kutilmoqda.
«Real Madrid» va «Barselona» bugungi bellashuv oldidan o‘z qaydnomalarini e’lon qilishdi. Har ikki jamoa ham eng kuchli tarkib bilan maydonga tushishga shaylanmoqda.
«Real Madrid» qaydnomasi:
Darvozani odatdagidek tajribali Tibo Kurtua qo‘riqlaydi, unga yordamchi sifatida Lunin va Mestre jalb etilgan. Himoya chizig‘ida Karvaxal, Militao, Aleksander-Arnold, Asensio, Karreras, Garsiya, Mendi va yosh iqtidor Xyoysen joy olgan.
Yarim himoyada jamoaning markaziy tayanchi — Bellingem, Kamavinga, Valverde, Tchuameni, Gyuler va Sebalos harakat qiladi. Ushbu zonadagi barqarorlik va tezkor uzatmalar madridliklarning asosiy quroli bo‘lib qolmoqda.
Hujum chizig‘ida esa jahon yulduzlari jamlangan: Vinisius, Endrik, Mbappe, Rodrigo, Gonsalo, Braim va yosh Mastantuono. Ronaldu davridan buyon bunday ilhomli hujum guruhi «Santyago Bernabeu»da ko‘rilmagan, deyish mumkin.
«Barselona» qaydnomasi:
Kataloniya klubi ham o‘zini butunlay jangga shay holda ko‘rsatdi. Darvozada Shensni asosiy nomzod sifatida qayd etilgan, unga yordamchi sifatida Koxen va Aler tayyor turibdi.
Himoyada Arauxo, Kubarsi, Balde, Kunde, Martin, Jofre va Espart bor. Ular «Real»ning tezkor hujumlariga qarshi turishda muhim rol o‘ynaydi.
Yarim himoya markazida Pedri, Fermin, de Yong, Kasado, Bernal va Dro singari nomlar bor. Bu zonadagi uyg‘unlik "Barselona"ning an’anaviy to‘p nazorati uslubini ta’minlaydi.
Hujum chizig‘ida esa tajribali Ferran, yosh Yamal, ingliz yulduzi Reshford, shuningdek Bardji va Antonio Fernandes harakat qiladi. Reshfordning ilk "El-Klassiko"dagi ishtiroki muxlislar uchun alohida qiziqarli nuqta bo‘lishi kutilmoqda.
Bu bellashuv nafaqat ochkolar, balki g‘urur, tarix va sharaf uchun kurash hisoblanadi. Ikki jamoa ham chempionlik poygasida bir xil natijalar ko‘rsatmoqda, shuning uchun bu o‘yinning natijasi mavsum taqdiriga jiddiy ta’sir ko‘rsatishi mumkin.
Tomoshabinlar Bellingem va Reshford, Vinisius va Pedri, Mbappe va Arauxo kabi duellarni kutmoqda. "El-Klassiko" — bu oddiy o‘yin emas, bu butun bir dunyo miqyosidagi sport festivali.
“Zamin”ni Telegramʻda oʻqing!
