O‘zbekiston Prezidenti Shavkat Mirziyoyev taniqli olim Azmiddin Sadriddinovning vafoti munosabati bilan hamdardlik bildirdi. Bu haqda davlat rahbari saytida ma’lum qilingan.
Shuningdek, bosh vazir Abdulla Aripov, Senat raisi Tanzila Narbayeva va boshqa rasmiylar ham o‘z hamdardliklarini izhor etishdi. Azmiddin Sadriddinov 1936-yilning 26-iyunida Toshkent shahrida tug‘ilgan.
U poytaxtdagi yengil sanoat institutini tamomlagan. Oliygohni tugatgach, o‘z faoliyatini Markaziy Osiyo Politexnika institutida (hozirgi Toshkent texnika universiteti) boshlagan.
Olim ko‘p yillar davomida Toshkent texnika universitetida ishlagan va oddiy o‘qituvchilikdan birinchi prorektorlik darajasigacha yetgan. Uning ilm-fanga qo‘shgan hissasi katta bo‘lib, qishloq xo‘jalik sohasi uchun mutaxassislar tayyorlash, qishloq xo‘jaligini mexanizatsiyalash bo‘yicha ilmiy ishlar yaratish va ularni amaliyotga tatbiq etishga bag‘ishlangan.
Azmiddin Sadriddinov qishloq xo‘jaligi mashinasozligini rivojlantirish yo‘lidagi xizmatlari uchun "O‘zbekiston qishloq xo‘jaligi mexanizatori" faxriy unvoni bilan taqdirlangan. Shuningdek, u "Do‘stlik" va "Mehnat shuhrati" ordenlari bilan mukofotlangan.
Mehmon guruhidagi foydalanuvchilar ushbu nashrga izoh qoldira olmaydi.
