Toshkent shahrida ijtimoiy tarmoqlarda muhokamaga sabab bo‘lgan holat bo‘yicha rasmiy munosabat bildirildi. Xususan, Toshkent davlat tibbiyot universiteti yaqinida hind tilida yozilgan reklama peshlavhasi o‘rnatilgani haqida tarqalgan xabarlardan so‘ng poytaxt hokimligi tomonidan tekshiruv o‘tkazildi.
O‘rganishlar natijasida mazkur reklama peshlavhasi belgilangan tartibda ruxsat olinmasdan, qonunga zid ravishda joylashtirilgani aniqlandi. Shuningdek, reklamadan axborot berish qoidalariga rioya etilmagani, jumladan, “Davlat tili to‘g‘risida” hamda “Reklama to‘g‘risida”gi qonun talablari buzilgani qayd etildi.
Ma’lum qilinishicha, amaldagi qonunchilikka muvofiq, O‘zbekiston hududida joylashtiriladigan barcha reklama materiallari avvalo davlat tilida bo‘lishi shart. Zarurat bo‘lsa, qo‘shimcha ravishda boshqa tillardan ham foydalanish mumkin, biroq davlat tilidagi matn asosiy va ustuvor hisoblanadi. Shu bilan birga, har qanday reklama tashqi axborot vositalarini joylashtirish uchun tegishli ruxsat hujjatlari talab etiladi.
Aniqlangan qoidabuzarliklar asosida hind tilida yozilgan noqonuniy reklama peshlavhasi belgilangan tartibda demontaj qilindi. Toshkent shahar hokimligi tadbirkorlar va tashkilotlarni reklama bannerlari, peshlavhalar hamda tashqi axborot vositalarini o‘rnatishda qonun talablariga qat’iy amal qilishga chaqirdi.
Shuningdek, bunday holatlar takrorlansa, reklama materiallari olib tashlanishi va mas’ul shaxslarga nisbatan qonunchilikda nazarda tutilgan choralar ko‘rilishi eslatib o‘tildi.
“Zamin”ni Telegramʻda oʻqing!
