Toshkentda voyaga yetmaganlarga bosqinchilik qilganlar qo‘lga olindi
32
Toshkent shahrida voyaga yetmagan o‘smirga nisbatan sodir etilgan bosqinchilik jinoyati jamoatchilik orasida katta rezonans uyg‘otdi. Poytaxt IIBB matbuot xizmati ma’lum qilishicha, ushbu jinoyatni sodir etgan ikki nafar shaxs qisqa muddat ichida qo‘lga olingan.
Ma’lumotlarga ko‘ra, hodisa “Qo‘yliq” kiyim bozorining orqa qismida, daryo bo‘yi hududida sodir bo‘lgan. Voyaga yetmagan Otabek ismli o‘smirga nisbatan kuch ishlatib, bosqinchilik qilingani haqida ichki ishlar organlariga xabar tushgan.
Tezkor-qidiruv tadbirlari davomida gumonlanuvchilar aniqlanib, Bektemir tumanida qo‘lga olingan. Ulardan biri Toshkent viloyatida yashovchi Anvar ismli shaxs, ikkinchisi esa Andijon viloyatidan bo‘lib, muqaddam sudlangan Bahrom ekani ma’lum qilindi.
Gumonlanuvchilardan birining so‘zlariga ko‘ra, hodisa kuni ular bozor tomon yo‘l olgan bo‘lgan. Shu paytda tasodifan uchragan o‘smir chalg‘itilgan, ortidan esa unga zarba berilgan. “Qilgan ishimdan qattiq afsusdaman”, deya izoh bergan u.
Ayni paytda mazkur shaxslarga nisbatan Jinoyat kodeksining tegishli moddalari bilan jinoyat ishi qo‘zg‘atilib, sud qaroriga asosan qamoq ehtiyot chorasi tanlangan.
Eslatib o‘tish joiz, so‘nggi vaqtlarda mamlakatning turli hududlarida uyushgan va zo‘ravonlikka moyil guruhlarga qarshi keskin choralar ko‘rilmoqda. Huquqni muhofaza qiluvchi organlar bunday jinoyatlarga nisbatan murosasiz munosabatda ekanini ta’kidlamoqda.
“Zamin”ni Telegramʻda oʻqing! 
