Disney'ning “Zveropolis 2” animatsion filmi prokatda millionlab dollar yig'ishni davom ettirmoqda. Kartina jahon bozorida 1,588 mlrd dollar natijaga yetdi va yaqin kunlarda 1,6 mlrd dollarlik marrani ham ortda qoldirishi kutilmoqda. Bu esa uni Disney tarixidagi eng ko'p daromad keltirgan animatsion filmga aylantirdi. Bu haqda playground.ru xabar beradi.
Filmning eng katta muvaffaqiyatlaridan biri Xitoy bozoriga to'g'ri keldi: “Zveropolis 2” bu yerda 600 mln dollardan oshiq yig'im to'plab, Xitoyda eng yaxshi natija ko'rsatgan Gollivud loyihasiga aylandi. Mahalliy kassa poygasida unga yaqinlashishi mumkin bo'lgan yagona raqib sifatida “Avatar: Olov va kul” tilga olinmoqda — u Xitoyda 100 mln dollardan ko'proq daromad qilgan. Yana bir rekord: “Zveropolis 2” PG reytingidagi filmlar orasida 1 mlrd dollarlik yig'imga eng tez yetgan film bo'ldi — premyeradan atigi 17 kun o'tib.
2016 yilgi hitning davomiy qismi 2025 yilda global prokatda 1 mlrd dollardan oshgan uch film qatoridan joy oldi. Bu ro'yxatda “Lilo va Stich”ning remeyki (1,03 mlrd dollar) hamda jahon prokatida 2,2 mlrd dollar bilan yetakchilik qilayotgan xitoy filmi “Nechja” ham bor.
Shu bilan birga, tarmoqda film sifati borasida keskin bahslar ham kuzatilmoqda: ayrim foydalanuvchilar ikkala qismning ham yuqori yig'imini keskin tanqid qilib, ularni “haddan tashqari shov-shuvga aylangan” loyiha deya baholamoqda. Bunday fikrlar fonida muxlislar orasida “eng yaxshi multfilm qaysi” mavzusidagi bahs yana avj oldi.
“Zamin”ni Telegramʻda oʻqing!
