Bugundan e’tiboran nafaqat qit’amiz, balki butun jahon futzal muxlislarining nigohlari Indoneziya poytaxti Jakarta shahriga qaratildi. 27 yanvardan 7 fevralga qadar davom etadigan Osiyo kubogi bahslari futzal ishqibozlariga yodda qoladigan, asabni qitiqlaydigan va juda ko‘p dramatik lahzalarni taqdim etishi aniq.
Indoneziya haqida qisqacha aytganda, bu — dunyoning eng ulkan arxipelaglaridan biri. Mamlakat 17,5 mingdan ortiq oroldan iborat bo‘lib, Yangi Gvineya orolining g‘arbiy qismi ham uning tarkibiga kiradi. Hududi 1 904,6 ming kvadrat kilometrga teng bo‘lgan bu diyor so‘lim tabiati, serqirra madaniyati va mehmondo‘stligi bilan tanilgan. Endi esa u yana bir bor Osiyo futzalining katta sahnasiga aylanmoqda.
Qayd etish kerak, Indoneziya futzal bo‘yicha Osiyo kubogini ikkinchi marta qabul qilyapti. Ilk bor 2002 yilda qit’a chempionati aynan shu mamlakatda o‘tkazilgan edi. Oradan 24 yil o‘tgach, Osiyo futzal jamoatchiligi yana Jakartada yig‘ilmoqda. Bu esa musobaqaning ruhini yanada ko‘tarib, tarixiy kayfiyatni his qildirishi shubhasiz.
Musobaqani yuqori darajada o‘tkazish uchun Jakartadagi ikki yirik sport inshooti to‘liq tayyor holatga keltirildi. Ular Osiyo kubogi–2026 bahslarining asosiy maydonlariga aylanadi.
Birinchi arena — poytaxt markazidagi Indoneziya Arena. Bu zamonaviy, universal sport majmuasi 2023 yil 7 avgust kuni rasman foydalanishga topshirilgan. 16 500 tomoshabinga mo‘ljallangan ushbu ulkan inshoot katta turnirlarni qabul qilish uchun juda qulay sharoitlarga ega.
Ikkinchi manzil — Jakarta Xalqaro Volodromi. Poytaxtning sharqiy qismida, Ravamangun hududida joylashgan ushbu kompleks 2018 yilgi Osiyo o‘yinlari doirasida qurilgan bo‘lib, 8 500 nafar muxlisni sig‘dira oladi. Volodromning atmosferasi ham alohida, u yerda o‘yinlar har doim shiddatli kayfiyatda o‘tadi.
Musobaqa taqvimiga ko‘ra, Osiyo kubogi–2026 da “A” va “C” guruhlari uchrashuvlari Indoneziya Arenada o‘tkaziladi. “B” va “D” guruhlari bahslari esa Jakarta Xalqaro Volodromida tashkil etiladi. Demak, Jakarta ikki maydonda bir vaqtning o‘zida futzalning katta bayramini namoyon qiladi.
Eng qiziq jihatlardan biri — O‘zbekiston terma jamoasining guruh bosqichidagi uchrashuvlari. Ma’lum qilinishicha, jamoamizning guruhdagi barcha o‘yinlari poytaxt markazidagi Indoneziya Arenada bo‘lib o‘tadi. Shuningdek, guruh bosqichining bir paytda start oladigan 3-tur uchrashuvlarida ham O‘zbekiston terma jamoasi aynan shu arenada maydonga tushadi. Guruhdagi ikkinchi bellashuv esa Jakarta Xalqaro Volodromida o‘tkaziladi.
Qisqasi, Jakartada futzal nafaqat musobaqa, balki katta shouga aylanadi. Endi esa barcha diqqat maydonda: har bir gol, har bir seyv, har bir xato guruh taqdirini hal qilishi mumkin. Muxlislarga esa bir narsa qoladi — yodda qoladigan kechalarga tayyor turish.
“Zamin”ni Telegramʻda oʻqing!
