Universal Mobile Systems (MobiUz бренди) компаниясининг хусусийлаштирилишига 10 та компания қизиқиш билдирди. Бу ҳақда Давлат активларини бошқариш агентлиги (ДАБА) маълум қилди.
Уларнинг барчаси мажбурий бўлмаган нарх таклифлари (NBO) билан ариза берган. Хусусийлаштириш жараёнида халқаро компаниялар иштирок этмоқда.
Rothschild & Co стратегик ва молиявий маслаҳатчи сифатида, KPMG молиявий, солиқ ва юридик экспертиза учун, Deloitte эса мустақил баҳолаш учун масъул. Жараённинг биринчи босқичида АҚШ, Европа, Яқин Шарқ, Жанубий Кавказ ва Осиёдан 15 та компания қизиқиш билдирган эди.
Ҳозирда NBO босқичини ўтган номзодлар мажбурий таклифларни (BO) тақдим этишга тайёрланмоқда. Улар компаниянинг батафсил таҳлилий ҳисоботлари ва аудит натижалари жойлашган виртуал маълумотлар хонасига кириш имконига эга.
Мажбурий таклифлар 2025-йил 19-декабр куни Тошкент вақти билан 23:59 да якунланади. Иштирокчилар E-ауксион платформаси орқали таклиф суммасининг камида 1 фоизига тенг кафолат тўловини амалга оширишлари керак.
Давлат активларини бошқариш агентлиги барча иштирокчиларга қизиқиш билдиргани учун миннатдорчилик билдирди ва хусусийлаштириш жараёни шартларини ўзгартириш ёки тўхтатиш ҳуқуқини ўзида сақлаб қолишини таъкидлади.
