Тошкент шаҳрига келаётган меҳмонлар учун янги қулайликлар жорий этилади. Энди пойтахтга киришда автомашинани шаҳар ташқарисидаги махсус тураргоҳларда қолдириб, марказга жамоат транспорти орқали кириш имкони яратилади. Бу ҳақда 16 декабрь куни Президент Шавкат Мирзиёев раислигида ўтган йиғилишда маълум қилинди.
Маълумки, декабрь ойи бошида пойтахтда транспорт тизимини яхшилаш ва тирбандликларни камайтиришга қаратилган алоҳида қарор қабул қилинган. Унга мувофиқ, Тошкентда транспорт ҳаракатини ягона ёндашув асосида бошқарадиган махсус марказ иш бошлайди. У ҳар бир кўча ва чорраҳадаги транспорт ҳамда пиёдалар оқимини сунъий интеллект орқали таҳлил қилиб, тирбандлик ва ЙТҲларнинг олдини олишга хизмат қилади.
Келгуси йилда пойтахтга киришдаги икки назорат пости шаҳар ташқарисига кўчирилиб, яна учтаси қайта қурилади. Ушбу ҳудудларда минглаб енгил ва юк автомобиллари учун тураргоҳлар, шунингдек, аҳоли учун дам олиш масканлари барпо этилади. Бу нуқталар жамоат транспорти тармоғи билан боғланади.
Шу билан бирга, шаҳарда “ақлли” чорраҳалар сони оширилиб, янги бекатлар, пиёда ва велойўлаклар қурилади, йўл инфратузилмаси янгиланади ҳамда электробуслар харид қилиниши режалаштирилган. Янги чоралар Тошкентда ҳаракатни енгиллаштириб, шаҳар муҳитини янада қулай қилишга қаратилган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
