«Манчестер Юнайтед» аңызы Пол Скоулз клуб басшылығына жазғы трансферлік терезеде «Арсенал» жартылай қорғаушысы Деклан Райсты сатып алуды ұсынды. Бұрынғы футболшының пікірінше, дәл осы ағылшын футболшысы командадан кетіп жатқан Каземироның орнын лайықты баса алады.
Бұл туралы Goal.com хабарлайды.
Скоулз бұған дейін Райстың ойынын сынағанымен, қазір өз пікірін толықтай өзгерткенін мойындады. Ол 27 жастағы футболшыны «Олд Траффорд» үшін «армандағы трансфер» деп атап, оны команданың орта шебіндегі мәселелерді шешетін негізгі буын ретінде көрсетті.
«Мен Деклан Райсты таңдар едім. Дұрыс, оны біраз сынағанмын, бірақ «Манчестер Юнайтедке» дәл Райс сияқты нағыз орталық жартылай қорғаушы керек», — деді Скоулз подкасттардың бірінде.
Сондай-ақ, ол клуб кез келген жоғары деңгейдегі футболшыны өз сапына тарта алатынына сенім білдірді.
Қазіргі уақытта «Манчестер Юнайтед» құрамды күшейту үшін бірқатар үміткерлерді, соның ішінде Адам Уортон мен Сандро Тоналиді де қарастыруда. Ал Деклан Райс қазіргі уақытта «Арсенал» сапында Англия Премьер-лигасының чемпиондығы үшін күресті жалғастыруда.
“Zamin”-ді Telegram-нан оқыңыз!
