«Ал-Наср» бош мураббийи Жорже Жезуш Криштиану Роналдунинг нега яқинлашиб келаётган учрашувда майдонга тушмаслигини изоҳлади. Бу ҳақда euro-football.ru хабар беради.
Ар-Риёд клуби чоршанба куни ОФК Чемпионлар лигаси доирасида «Аркадаг»га қарши ўйнайди. Португалиялик ҳужумчининг тез орада майдонга қайтиши кутилаётганди, бироқ бу сафар ҳам у рўйхатда бўлмайди.
Жезушнинг сўзларига кўра, жамоа зич тақвим сабаб Роналдуга ва асосий таркибдаги яна бир нечта футболчига дам беришга қарор қилган. Мураббий олдинда «Ал-Фатех»га қарши муҳим ўйин борлигини таъкидлади.
Al Nassr Zone келтирган иқтибосда Жезуш: «Роналдунинг дам олиши янгилик эмас. Бу Саудия Арабистонидан ташқарида ўтадиган учрашувларда у қатнашмай қоладиган биринчи ҳолат эмас», — дея қайд этди.
Саудия чемпионатидаги «Ал-Фатех» — «Ал-Наср» баҳси шанба, 14-февраль куни бўлиб ўтади.
“Zamin”ни Telegram'да ўқинг!
