Оилавий вазият сабаб футболчилик фаолиятини якунлаган словениялик ярим ҳимоячи Кевин Кампль «РБ Лейпциг»даги даврларини эслаб, ўша пайтдаги бош мураббий Ралф Рангник билан боғлиқ воқеани ҳикоя қилди. Унинг айтишича, рафиқаси туғруқ арафасида бўлганига қарамай, мураббий уни майдонга тушишга мажбур қилган. Бу ҳақда euro-football.ru хабар беради.
Кампльнинг сўзларига кўра, Рангник унга: «Ортиндан самолёт юбораман, сен бу ўйинда майдонга тушишинг шарт», деган.
Гап «Волфсбург»га қарши баҳс ҳақида кетмоқда: ўша учрашувда Рангник жамоаси 4:0 ҳисобида ғалаба қозонган. Бироқ ўйиндан кейин футболчи янада ҳайратда қолган — Рангник журналистлар билан суҳбатда гўёки Кампльнинг ўзи жуда ўйнашга интилганини айтган, ҳолбуки вазият аслида бунинг тескариси бўлган.
“Zamin”ни Telegram'да ўқинг!
