Россия терма жамоаси март ойида Малига қарши уй учрашувини ўтказиши кутилмоқда. РФУ ҳозирча бу ҳақда расман эълон қилмаган бўлса-да, Мали томони ўйин Краснодарда бўлишини бир неча бор тасдиқлаган. Бу ҳақда euro-football.ru хабар беради.
Мали футбол федерацияси бош котиби Сиди Бекайе Россияга қарши баҳс учун жамоа энг кучли таркибда йўл олишини маълум қилди. Унинг сўзларига кўра, Биссума, Ниакате, Сангаре, Нене ва бошқа футболчилар тахминан 25–26 март кунлари Краснодарга етиб келиб, ўйинолди машғулотини ўтказади.
Бекайе, шунингдек, Россия билан ўртоқлик учрашувини ташкил этиш бўйича келишув жуда осон чиққанини таъкидлади. Мали томони кучли рақибга қарши майдонга тушишдан мамнун бўлишини уқтирди.
Эслатиб ўтамиз, Россия терма жамоаси УЕФА ва ФИФА санкциялари остида қолмоқда, шу сабабли ҳозирча фақат ўртоқлик учрашувларида иштирок этиши мумкин.
“Zamin”ни Telegram'да ўқинг!
