Марсело Гальярдо мураббий сифатидаги сўнгги учрашувини ўтказди: унинг жамоаси Банфилдга қарши баҳсда 3:1 ҳисобида ғалаба қозониб, кетма-кет уч мағлубиятдан иборат омадсиз серияга нуқта қўйди. Бу ҳақда euro-football.ru хабар беради.
Айнан шу муваффақиятсиз давр Гальярдонинг лавозимини сақлаб қолишига ҳалал бергани айтилади, бироқ клуб унга мавсумни муносиб тарзда якунлаш имконини берди. У эса хайрлашув лаҳзаларини жуда ҳиссиётли ўтказди.
Ўйиндан кейин кўз ёшларини яширмаган Гальярдо мухлисларга миннатдорлик билдирди: «Ҳаммага шунчаки раҳмат. Сизларнинг муҳаббатингизни бир сўз билан ифодалаш қийин. Мен бутунлай кетмаяпман. Ривердан ҳеч ким абадий кетмайди. Бу сеҳрли маскан: кетганингда ҳам барибир клуб билан бирга қоласан», деди у.
Эслатиб ўтамиз, Гальярдо 1990-йилларда клуб шарафини ҳимоя қилган ва Аргентина терма жамоасида ҳам тўп сурган.
“Zamin”ни Telegram'да ўқинг!
