Tramp–Putin suhbati oldidan Yevropa yetakchilari bilan muhokama o‘tkazildi

AQSH prezidenti Donald Tramp va Rossiya yetakchisi Vladimir Putin o‘rtasidagi kutilgan muloqot oldidan 18 may, yakshanba kuni kechqurun Yevropa davlatlari yetakchilari Vashington bilan Ukrainadagi vaziyat yuzasidan muhim maslahatlashuv o‘tkazdi.

Germaniya kansleri Fridrix Mers, Fransiya prezidenti Emmanuel Makron, Buyuk Britaniya bosh vaziri Kir Starmer va Italiya bosh vaziri Amerika rahbari bilan telefon orqali aloqaga chiqib, Ukrainadagi urush va tinchlik imkoniyatlari muhokama qilindi.

Germaniya rasmiysi Shtefanus Kornelius bayonotiga ko‘ra, Tramp–Putin muloqoti ertaga, dushanba kuni bo‘lib o‘tadi va undan so‘ng fikr almashinuvi yana davom ettiriladi.

Buyuk Britaniya bosh vaziri Kir Starmerning ta’kidlashicha, muloqotda urushning har ikki tomon uchun og‘ir oqibatlari va urushni to‘xtatishga qaratilgan diplomatik choralar keng muhokama qilindi. Agar Rossiya o‘t ochishni to‘xtatish va tinchlik muzokaralariga jiddiy yondashmasa, Yevropaning navbatdagi sanksiya bosqichi ham muhokama qilindi.

Fransiya prezidenti Emmanuel Makron o‘zining ijtimoiy tarmoqdagi sahifasida bunday yozdi: «Prezident Putin ertaga Tramp taklif qilgan va Ukraina hamda Yevropa tomonidan qo‘llab-quvvatlanayotgan 30 kunlik shartsiz otashkesimni qabul qilib, tinchlikka intilishini ko‘rsatishi shart».

Zamin.uz tahririyati tinchlik muzokarasi ortidagi diplomatik jarayonlarni diqqat bilan kuzatishda davom etadi. Siz bu uchrashuvlardan qanday natijalarni kutyapsiz? “Zamin”ni Telegramʻda oʻqing!