O‘zbekiston prezidenti Shavkat Mirziyoev Yangi 2026 yil munosabati bilan yurtdoshlariga murojaat qilib, o‘tib borayotgan yil yakunlarini sarhisob qildi hamda kelgusi yil uchun asosiy vazifalarni belgilab berdi. Davlat rahbari Yaratgandan Vatanimizni asrashini, xalqimiz hayotini yanada farovon qilish yo‘lidagi intilishlarimizni qo‘llab-quvvatlashini so‘radi. Bu haqda kursiv.uz xabar beradi.
Prezident ta’kidlashicha, 2025 yil mamlakatda keng ko‘lamli islohotlar amalga oshirilgan, kelajakka ishonch yanada mustahkamlangan davr bo‘ldi. Murakkab xalqaro vaziyatga qaramay, belgilangan maqsadlar to‘liq bajarildi: yalpi ichki mahsulot hajmi ilk bor 145 milliard dollardan oshdi, O‘zbekiston o‘rtacha daromadli davlatlar qatoridagi o‘rnini yanada mustahkamladi.
Mirziyoevning qayd etishicha, iqtisodiy o‘sish natijalari aholining kundalik hayotida ham sezilmoqda — oilalar daromadi, mahallalarning rivoji, yoshlar uchun yaratilayotgan imkoniyatlar kengaymoqda. U fuqarolarning tadbirkorlik, ilm-fan, madaniyat va sportdagi yutuqlarini alohida e’tirof etib, uy-joy sharoitini yaxshilagan oilalar soni ortib borayotganini ham ta’kidladi.
Davlat rahbari 2026 yil O‘zbekistonda “Mahalla va butun jamiyat taraqqiyoti yili” deb e’lon qilinganini eslatdi. Rejalarga ko‘ra, minglab mahallalarda infratuzilma yangilanadi, iqtisodiyot texnologik va innovatsion o‘sish modeliga bosqichma-bosqich o‘tkaziladi, aholining daromadi hamda xarid qobiliyati oshiriladi, ijtimoiy qo‘llab-quvvatlash ko‘lami kengaytiriladi.
Murojaat yakunida prezident o‘zbekistonliklarga sog‘lik, farovonlik va tinchlik tilab, mamlakat barqaror taraqqiyot yo‘lidan izchil davom etishiga ishonch bildirdi. U yangi yil har bir xonadonga baxt va baraka, yurtimizga esa taraqqiyot, osoyishtalik olib kelishini tiladi.
Shuningdek, avvalroq O‘zbekiston xalqini Yangi yil bilan Rossiya prezidenti Vladimir Putin, Xitoy Xalq Respublikasi raisi Si Szinpin, Qozog‘iston rahbari Qosim-Jo‘mart Toqaev va boshqa davlat yetakchilari ham tabriklagani qayd etildi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
