Sudanning urush girdobidagi Shimoliy Darfur viloyatida bolalar orasida o‘tkir to‘yib ovqatlanmaslik holatlari keskin kuchaydi. BMTning Bolalar jamg‘armasi (YUNISEF) bunday oilalarga gumanitar yordam yetib borishi uchun hududga kirish imkonini zudlik bilan ta’minlashga chaqirdi. Bu haqda podrobno.uz xabar beradi.
Al Jazeera xabariga ko‘ra, Um-Baru hududida tekshiruvdan o‘tkazilgan 500 nafar bolaning 53 foizida o‘tkir oziqlanish yetishmovchiligi aniqlangan. Ularning har oltinchisi esa og‘ir darajadagi ozib ketishdan aziyat chekmoqda — bu hayot uchun xavfli holat bo‘lib, shoshilinch davolashsiz bir necha hafta ichida o‘limga olib kelishi mumkin.
YUNISEF ijrochi direktori Ketrin Rassell vaqt omili hal qiluvchi ahamiyat kasb etayotganini ta’kidladi: yordamga kirish imkoni bo‘lmagan har bir kun qurbonlar sonini oshiradi. Qayd etilishicha, hozir Um-Baruda taxminan 100 ming nafar qochqin istiqomat qilmoqda.
2023 yilda boshlangan mojaro minglab insonlar halok bo‘lishiga, 12 milliondan ortiq odamning ko‘chishga majbur bo‘lishiga va mamlakatning ayrim hududlarida ocharchilik yuzaga kelishiga sabab bo‘ldi. BMT bahosiga ko‘ra, Sudan hozir dunyodagi “eng og‘ir gumanitar inqiroz”lardan birini boshdan kechirmoqda.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
