Aktyor Muhammadiso Abdulxairov yo‘llarda avtomobil raqamiga yoki odamning qayerlik ekaniga qarab munosabat bildirish odati keskin tanqid qildi. Uning aytishicha, “qayerliksiz?” degan savol ko‘pincha beozor qiziqish emas, balki odamlarni ich-ichidan ajratishga xizmat qiladi. Aktyor bu savolni yomon ko‘rishini yashirmay, bunday yondashuv jamiyatni bo‘linishga olib kelishini ta’kidladi.
Abdulxairovning fikricha, odamning millati yoki qayerdanligi tashqi ko‘rinishidan ham ayon: “Meksikadan ham, Ispaniyadan ham emasman — o‘zbekistonlikman, bu ko‘rinib turibdi”, deydi u. Uning aytishicha, agar suhbatdosh Samarqandlik bo‘lsa va o‘zi ham Samarqanddan ekanini aytsa, munosabat birdan iliqlashadi. Ammo boshqa viloyat nomi aytilsa, e’tibor pasayib ketishi mumkin. Bu esa, u ta’kidlaganidek, bilib-bilmay millatchilikka eltadi.
Aktyor yo‘llarda avtomobil raqamiga qarab ham bir-birimizni baholashimizni achchiq bilan tilga oldi. “O‘zimizni o‘zimiz g‘ajib tashlayapmiz”, deydi u. Abdulxairovning fikricha, Farg‘onalik ham, Qashqadaryolik ham begona emas — barchamiz birmiz, bir Vatan farzandimiz. Qiyin vaziyatlarda birga xizmat qiladigan ekanmiz, kundalik hayotda ham bir-birimizni ajratmasligimiz kerak.
“Zamin”ni Telegramʻda oʻqing!
