“Qirol sher” multfilmi rejissyori hayotdan ko‘z yumdi
16
“Disney” kompaniyasining eng mashhur animatsion loyihalaridan biri — «Qirol sher» multfilmini yaratishda ishtirok etgan rejissyorlardan biri Rojer Allers 76 yoshida olamdan o‘tdi. Bu haqda uning yaqin hamkasbi va rejissyor Deyv Bossert rasman ma’lum qildi.
Bossert ijtimoiy tarmoqlarda qoldirgan xotirasida Allersning o‘limi uni chuqur qayg‘uga solganini ta’kidladi. Uning so‘zlariga ko‘ra, ular yaqin haftalargacha aloqada bo‘lib turgan, Allers esa o‘limidan sal oldin Misr bo‘ylab sayohat qilgan. Shu sababli bu yo‘qotish yanada kutilmagan va og‘ir qabul qilingan.
Rejissyor do‘stini g‘ayrioddiy iste’dod sohibi, chuqur fikrlaydigan rassom va “Disney” animatsiyasini yangi bosqichga olib chiqqan muhim shaxslardan biri sifatida esladi. Uning ta’kidlashicha, Allers “Disney”ning qayta tiklanish davrida hal qiluvchi rol o‘ynagan ijodkorlardan edi.
Rojer Allers rejissyor Rob Minkoff bilan hamkorlikda 1994 yilda ekran yuzini ko‘rgan «Qirol sher» multfilmini suratga olgan. Ushbu asar nafaqat studiya tarixida, balki jahon animatsiyasida ham eng muvaffaqiyatli loyihalardan biri sifatida e’tirof etilgan. Asl multfilm jahon prokatida 771 million dollar daromad keltirgan.
2019 yilda ishlangan remeyk versiya esa butun dunyo bo‘ylab 1,6 milliard dollar yig‘ib, barcha davrlarning eng ko‘p daromad keltirgan filmlari qatoriga kirgan.
Allersning ijodiy faoliyati faqat «Qirol sher» bilan cheklanib qolmagan. U, shuningdek, «Aladdin», «Suv parisi», «Sohibjamol va mahluq», «Ov mavsumi», «Oliver va kompaniya» kabi qator mashhur animatsion loyihalarda ham faol ishtirok etgan.
Animatsiya olami yana bir buyuk ijodkoridan ayrildi. Rojer Allers qoldirgan meros esa hali uzoq yillar davomida tomoshabinlar qalbidan joy olishda davom etadi.
“Zamin”ni Telegramʻda oʻqing! 
