O‘zbekiston Prezidenti Shavkat Mirziyoyev Toshkent shahrida ekologik vaziyatni yaxshilash bo‘yicha shoshilinch choralar ko‘rishni nazarda tutuvchi qarorni imzoladi. Ushbu qarorga muvofiq, shaharda maxsus komissiya tashkil etiladi.
Komissiya ekologik holatni nazorat qiladi va zarur cheklovlarni joriy etadi. Maxsus komissiya zarurat tug‘ilganda issiqxonalar va havoni ifloslantiruvchi boshqa obyektlarning faoliyatini vaqtincha to‘xtatishi mumkin.
Shuningdek, sanoat korxonalarida filtrlar o‘rnatilishi va ekologiya bo‘yicha ilgari qabul qilingan qarorlarning bajarilishi ustidan nazorat olib boradi. Komissiya AI-80 benzini iste’molidan voz kechish bo‘yicha chora-tadbirlarni ham kuzatib boradi.
Tashkilot vakillari daryolar va kanallarning suvni himoya qilish hududlarida qurilishlarni taqiqlash, shuningdek, chang ifloslanishi yuqori bo‘lgan davrda korxonalar va transport harakatiga cheklovlar kiritish vakolatiga ega bo‘ladi. Komissiya qarorlari barcha davlat muassasalari, tashkilotlar va fuqarolar uchun majburiy hisoblanadi.
Bundan tashqari, qurilish sohasida changga qarshi kurash uskunalaridan foydalanishni majburiy qilish kabi talablar joriy qilinadi. Zarurat tug‘ilganda transport harakatiga cheklovlar kiritilishi mumkin.
Masalan, yuk avtomobillarining vaqtincha shaharga kirishi taqiqlanishi yoki transport harakatining juft va toq kunlarga bo‘linishi belgilanishi mumkin. Mazkur cheklovlar elektromobillar uchun tatbiq etilmaydi.
Mehmon guruhidagi foydalanuvchilar ushbu nashrga izoh qoldira olmaydi.
