“Barselona” hujumchisi Rafinya Dias Ispaniya Superkubogi finalida Madridning “Real”ini 3:2 hisobida yengganidan keyin o'yin haqidagi fikrlari bilan o'rtoqlashdi. Bu haqda euro-football.ru xabar beradi.
Braziliyalik vinger uchrashuvda dubl qayd etdi: 36-daqiqada hisobni ochdi, 73-daqiqada esa g'alaba golini urib, jamoasiga kubokni taqdim etdi.
“Biz bu yerga dam olish uchun emas, yutish uchun keldik. O'ylaymanki, har ikki o'yinda ham yaxshi harakat qildik: vaziyatni nazorat qildik va munosib tarzda g'alabaga erishdik. Qachonki shunchalik jam bo'lsak, bizni yengish juda qiyin. Ikkinchi bo'limdagi o'yinimizdan mamnunman — kayfiyat juda yuqori edi, hammasi o'xshadi”, — deya Rafinyaning so'zlarini keltiradi Barca Universal.
Shu tariqa, “Barselona” bosh murabbiy Hans-Diter Flik qo'l ostida so'nggi bir yarim yil ichida o'zining to'rtinchi sovrinini qo'lga kiritdi.
“Zamin”ni Telegramʻda oʻqing!
