2024 yilda Yevropa tiklanish va taraqqiyot banki Markaziy Osiyo mintaqasiga rekord darajadagi 2,26 milliard dollar mablag‘ yo‘naltirdi. Ushbu mablag‘ning 938 million dollari O‘zbekiston hissasiga to‘g‘ri keldi.
Bu raqamlar Toshkentda bo‘lib o‘tgan «Yevropa Ittifoqi – Markaziy Osiyo» uchinchi Iqtisodiy forumida muhokama qilindi. Mazkur tadbirda 32 mamlakatdan 400 dan ortiq ishtirokchi qatnashdi.
So‘nggi yetti yil ichida Yevropa Ittifoqi va Markaziy Osiyo davlatlari o‘rtasidagi savdo hajmi to‘rt barobarga oshib, 54 milliard yevroga yetdi. Shu bilan birga, Yevropa Ittifoqi mintaqaga 100 milliard yevrodan ortiq to‘g‘ridan-to‘g‘ri investitsiyalar kiritib, yirik investor bo‘lib qolmoqda.
O‘zbekiston bosh vaziri o‘rinbosari Jamshid Xo‘jayevning ta’kidlashicha, Yevropa Ittifoqi bilan munosabatlar barqaror rivojlanmoqda va chuqur hamkorlik bosqichiga o‘tmoqda. Forum davomida biznes muhitini yaxshilash, investitsiyalarni jalb qilish, qo‘shilgan qiymat zanjirlarini rivojlantirish, kadrlar tayyorlash va mintaqaviy integratsiyani chuqurlashtirish masalalari muhokama qilindi.
Tadbir yakunida ekologiya, sug‘orish, geoma’lumotlarni boshqarish, tartibga solish va xavfsizlikka oid oltita hujjat imzolandi.
Mehmon guruhidagi foydalanuvchilar ushbu nashrga izoh qoldira olmaydi.
