O‘zbekiston Respublikasi Prezidenti Shavkat Mirziyoyev Vashington shahriga tashrifning ishbilarmonlik dasturi doirasida ikki tomonlama hujjatlarni imzolash marosimi hamda qo‘shma loyihalar taqdimotida ishtirok etdi. Tadbir “gapdan — ishga” degan formatda o‘tdi: muzokara, taqdimot, keyin esa aniq kelishuvlar.
Uchrashuvda AQSH hukumati va moliya institutlari vakillari keng tarkibda qatnashdi. Xususan, savdo vakili Jeymison Grir, Prezidentning maxsus vakili Paolo Zampolli, Eksimbank prezidenti va raisi Jon Yovanovich, AQSH–O‘zbekiston savdo palatasi raisi Kerolin Lemm, shuningdek, «Traksis», «Valmont Indastris», «Galf Oyl», «Avijen Broyler Briding Grup», «Jon Dir», «BlekRok Faynenshl Markets Edvayzori», «Oppenxaymer» va boshqa yetakchi kompaniyalar rahbarlari ishtirok etdi.
Videoaloqa orqali O‘zbekiston hududlari rahbarlari ham muloqotga ulandi. Bu esa uchrashuvning “faqat markazda gap bo‘ldi” emas, hududlargacha yetib boradigan amaliy rejaga aylanayotganini ko‘rsatdi.
Davlat rahbari nutqida bu uchrashuv avval o‘tkazilgan davra suhbatining mantiqiy davomi ekanini, iqtisodiy hamkorlik esa strategik ishonch va o‘zaro manfaatdorlik ruhida yangi bosqichga ko‘tarilayotganini ta’kidladi.
«Bugungi kunda sheriklar ishonchli, qoidalar aniq-ravshan, hamkorlik esa uzoq muddatli bo‘lishi yetakchi o‘ringa chiqmoqda. Biz Amerika Qo‘shma Shtatlari bilan hamkorligimizni aynan shu mantiq asosida qurmoqdamiz», — dedi Shavkat Mirziyoyev.
Uchrashuvda O‘zbekistonning ijtimoiy-iqtisodiy taraqqiyotidagi muhim yo‘nalishlar ham tilga olindi. Prezident iqtisodiyot O‘zbekiston va AQSH o‘rtasidagi strategik sheriklikning asosiy tayanch nuqtalaridan biri ekanini alohida qayd etdi.
Hamkorlikning ustuvor yo‘nalishlari qatorida o‘ta muhim xomashyo, neft-kimyo, energetika, qishloq xo‘jaligi, parrandachilik va boshqa tarmoqlar sanab o‘tildi. Shu bilan birga, AQSH Xalqaro moliyaviy taraqqiyot korporatsiyasi hamda Eksimbankining bitimlarga hamrohlik qilishda doimiy hamkor sifatidagi o‘rni tobora mustahkamlanayotgani ta’kidlandi.
Qo‘shma Ishbilarmonlik va investitsiya kengashi imkoniyatlaridan yanada faol foydalanish zarurligi ham qayd etildi. Hududlararo aloqalarni kuchaytirish maqsadida esa O‘zbekiston hududlari rahbarlarining AQSHdagi hamkor shtatlarga tashriflarini tashkil etish bo‘yicha topshiriq berildi. Ya’ni hamkorlik “poytaxtda qolib ketmaydi”, degan gap.
Tadbir yakunida Prezident ishtirokida qator muhim yo‘nalishlarni qamrab olgan ikki tomonlama hujjatlar imzolandi. Jumladan:
- yoqilg‘i quyish shoxobchalari tarmog‘ini barpo etish,
- yomg‘irlatib sug‘orish texnologiyalarini joriy qilish,
- muhim minerallarni qazib olish va yetkazib berish,
- parrandachilik klasteri tashkil etish,
- agrosanoatni rivojlantirish,
- moliya bozorini kengaytirish,
- investitsiya muhitini yanada yaxshilash.
Qisqasi, bu tashrifdan “faqat bayonot” emas, konkret loyihalar portfeli chiqyapti. Endi asosiy nuqta — imzolangan kelishuvlar tezroq ishga tushsa, natijasi hududlarda ham seziladi: yangi ish o‘rinlari, texnologiya, eksport va yanada kattaroq investitsiya oqimi.
“Zamin”ni Telegramʻda oʻqing!
