1 aprel kuni Buxoro shahrida “Nasriddin Afandi” hamda “Sharq taomlari” anʼanaviy bayram-festivali tashkil etiladi. Bu haqda Turizm qo‘mitasi rasmiy maʼlumot berdi.
Mashhur festival doirasida mehmonlar qisqa yumoristik, satira va latifalardan tashkil topgan miniatyuralar, shu jumladan Xo‘ja Nasriddinning kundalik ertaklari bilan bog‘liq hazillar va muloqotlardan bahramand bo‘lishlari mumkin. Shuningdek, tadbir rang-barang afsonalar, qiziqarli voqealar va musiqiy chiqishlar bilan boyitilgan bo‘lib, ishtirokchilarga o‘ziga xos xushhollik va xotiralar sovg‘a qiladi.
“Sharq taomlari” festivali esa mehmonlarga O‘zbekiston milliy oshxonasining turli mazali taomlari, milliy shirinliklar va anʼanaviy taomlarini tatib ko‘rish imkonini taqdim etadi. Bu festival orqali mehmonlar nafaqat taomlardan bahramand bo‘ladi, balki milliy anʼanalar va urf-odatlar bilan yaqindan tanishishlari mumkin.
Mavjud maʼlumotlarga ko‘ra, “Nasriddin Afandi” festivali Nodir Devonbegi madrasasi va Nasriddin Afandi haykali atrofidagi maydonda, “Sharq taomlari” festivali esa “Somoniylar” bog‘i kirishidagi hovuz oldidagi keng maydonda o‘tkaziladi.
Buxorodagi bu anʼanaviy festival nafaqat yumor va hazilni yoqtiruvchilarni, balki milliy taomlar va madaniy merosga qiziquvchilarni ham jalb qiladi. Tadbir ishtirokchilari nafaqat xushnudlikka, balki xotirada uzoq saqlanadigan taassurotlarga ham ega bo‘lishlari mumkin.
“Zamin”ni Telegramʻda oʻqing!
