Bugun, 5 sentyabr kuni, O‘zbekiston milliy terma jamoasi bosh murabbiyi Timur Kapadze 44 yoshni qarshi oldi. Uning hayotidagi ushbu muhim sana o‘zi boshqarayotgan jamoa uchun ham yodda qolarli kun bo‘ldi.
Milliy terma jamoa a’zolari ustozlari uchun o‘zgacha tuhfa tayyorlashdi — Qirg‘izistonga qarshi «Olimpiya» stadionida kechgan CAFA Nations Cup bahsida yirik 4:0 hisobida zafar qozonishdi. Bu g‘alaba nafaqat finalga yo‘llanma, balki murabbiy uchun ham haqiqiy bayram sovg‘asi bo‘ldi.
Uchrashuv davomida stadion atmosferasi o‘zgacha ruh bilan to‘ldi. Murabbiyning oila a’zolari ham tribunadan joy egallab, alohida quvonchga sherik bo‘lishdi. Ular ko‘targan banner barcha muxlislarning diqqatini o‘ziga qaratdi. Unda katta iftixor bilan: «Bizning qahramon dadamiz bor. Tug‘ilgan kun bilan», — degan so‘zlar yozib qo‘yilgandi.
Futbolchilarning maydondagi mehnati va oila a’zolarining samimiy qo‘llab-quvvatlovi Timur Kapadze uchun ushbu sana tarixda alohida iz qoldirishi shubhasiz. Shu tariqa, 44 yoshga qadam qo‘ygan murabbiy o‘z tug‘ilgan kunini shogirdlari bilan birgalikda yodda qolarli g‘alaba bilan nishonladi.
“Zamin”ni Telegramʻda oʻqing!
