O‘zbekiston milliy terma jamoasini 2026 yilgi Jahon chempionatiga olib chiqqan bosh murabbiy Temur Kapadze o‘z lavozimini tark etdi. Bu haqda O‘zbekiston futbol assotsiatsiyasi rasman ma’lum qildi.
O‘FAning bayonotiga ko‘ra, Kapadze jamoani o‘z xohishiga ko‘ra tark etgan. Uning xizmatlari uchun minnatdorlik bildirildi hamda kelgusidagi faoliyatida muvaffaqiyat tilar ekan, mutaxassisga boshqa takliflar ham tushayotgani ma’lum qilindi.
Kapadze 2024-yil 22-yanvar kuni milliy jamoa bosh murabbiyi etib tayinlangan edi. Uning rahbarligida “oq bo‘rilar” 256 kun davomida 8 ta uchrashuv o‘tkazib, 5 ta g‘alaba va 3 ta durang qayd etdi. Qizig‘i shundaki, jamoa uning qo‘l ostida birorta mag‘lubiyatga uchramadi.
Bu davrda O‘zbekiston terma jamoasi jami 13 ta gol urgan va faqat 5 tasini o‘tkazib yuborgan. Har bir o‘yinda o‘rtacha 2,25 ochkodan to‘plangan bo‘lib, jamoa 18 ochko bilan yaxshi natija ko‘rsatdi.
Temur Kapadze ish davrida umumiy 35 nafar futbolchini maydonga tushirdi. Uning taktik yondashuvi va jamoaga bo‘lgan ishonchi muxlislar orasida katta hurmat qozondi. Kapadze jamoada o‘ziga xos ish muhitini yaratgani, futbolchilar bilan yaqin muloqotda bo‘lgani va yoshlarga ishongani bilan ham esda qoldi.
Shu yilning kuzida esa uning o‘rnini dunyo futbolida katta obro‘ga ega italiyalik mutaxassis — 2006 yilgi jahon chempioni Fabio Kannavaro egalladi. Kapadze ma’lum muddat Kannavaroga yordamchi sifatida faoliyat yuritdi va keyin rasman o‘z yo‘lini tanladi.
O‘z navbatida, Kapadzening milliy jamoa bilan yo‘li nafaqat raqamlarda, balki muxlislar qalbida ham iz qoldirdi. Uning rahbarligida jamoa o‘z o‘yinini topa boshladi, maydondagi intizom va jamoaviy ruh kuchaydi.
Endilikda futbol muxlislari undan yangi loyihalarda ham shunday mas’uliyat va fidoyilik ko‘rishni kutmoqda. Chunki Temur Kapadze — O‘zbekiston futboli tarixida o‘z izini qoldirgan murabbiylardan biri sifatida xotiralarda qoldi.
“Zamin”ni Telegramʻda oʻqing!
