Nunu Mendesh kelajagi yana katta transfer muhokamalari markaziga chiqdi. Ispaniya ommaviy axborot vositalari maʼlumotiga koʻra, Portugaliya terma jamoasi va Pari Sen-Jermen klubi qanot himoyachisi La Liga grandlaridan birida faoliyatini davom ettirishi mumkin.
Xususan, "Barselona" klubi 23 yoshli futbolchini oʻz safiga qoʻshib olishga jiddiy qiziqish bildirmoqda. Bu transfer klubning kelajakdagi himoya chizigini kuchaytirish strategiyasi doirasida koʻrilmoqda.
Maʼlumotlarga koʻra, bu tashabbusni shaxsan jamoa bosh murabbiyi Xans-Diter Flik ilgari surgan. Germaniyalik mutaxassis klub rahbariyatiga Mendeshni xarid qilish boʻyicha aniq taklif bilan chiqqan va uni jamoa uchun ustuvor maqsad sifatida belgilagan.
Mendesh hozirgi kunda Yevropada eng isteʼdodli yosh qanot himoyachilaridan biri sifatida baholanmoqda. Uning tezligi, texnikasi va hujumga qoʻshilib ketish qobiliyati koʻplab top-klublar eʼtiborini tortib kelmoqda.
Transfermarkt ekspertlari hisob-kitobiga koʻra, futbolchining bozor qiymati taxminan 75 million yevroni tashkil etadi. Bu esa uning transferi juda katta sarmoya talab qilishini anglatadi.
Futbolchi bilan Pari Sen-Jermen oʻrtasidagi amaldagi shartnoma 2029 yil iyun oyi oxirigacha moʻljallangan. Bu esa har qanday ehtimoliy transferni yanada murakkablashtiradi.
Hozircha rasmiy muzokaralar boshlangani tasdiqlanmagan boʻlsa-da, futbol jamoatchiligi bu transfer yozgi oynadagi eng qiziqarli syujetlardan biri boʻlishi mumkinligini taʼkidlamoqda.
“Zamin”ni Telegramʻda oʻqing!
