Pokistonda ISHIDning xavfli yetakchisi qo‘lga olindi: tafsilotlar oshkor qilindi

Pokiston va Afg‘oniston chegarasida yirik maxsus operatsiya o‘tkazilib, natijada terrorchilik tashkiloti ISHIDning yuqori martabali yetakchilaridan biri ushlandi. Bu haqda Turkiyaning Anadolu agentligi xabar tarqatdi.

Mazkur xavfli terrorchiga qarshi operatsiya Turkiya hamda Pokistonning razvedka xizmatlari tomonidan birgalikda amalga oshirildi. Bu amaliyotda Pokiston va Afg‘oniston chegarasidagi chegara hududi maxsus xizmatlar nazorati ostiga olingan bo‘lib, “to‘q sariq” darajada xavfli deb belgilangan terrorist qo‘lga tushirilgan.

Hibsga olingan shaxs, ISHID safida «Abu Yosir Al Turkiy» taxallusi bilan tanilgan O‘zg‘ur Altun ekani ma’lum qilindi. U Turkiya fuqarosi bo‘lib, ISHIDning ommaviy axborot va logistika tarmoqlarini boshqarishda katta rol o‘ynagan.

Turkiya razvedkasining ma’lum qilishicha, qo‘lga olingan terrorchi ISHIDning Turkiya va Yevropa mamlakatlariga qarshi qator terroristik harakatlarini rejalashtirishda va amalga oshirishda ishtirok etgan. Jumladan, konsert zallari, bozorlar va boshqa aholi gavjum bo‘lgan jamoat joylariga hujumlarni tashkil qilishda ayblanmoqda. Bu xavfli terroristning qo‘lga olinishi natijasida terrorchilarning katta rejalari barbod qilingan, deb xabar beradi turk maxsus xizmatlari.

Qo‘lga olish paytida terroristlar faoliyati bilan bog‘liq raqamli materiallar, hujumlar tayyorlangan rejalar va terrorchilarni yollash haqidagi muhim ma’lumotlar ham musodara qilingan. Bu hujjatlar va dalillar terroristik tarmoq faoliyatining keng ko‘lamini ko‘rsatadi.

Aniqlangan ma’lumotlarga ko‘ra, O‘zg‘ur Altun Turkiya va Yevropaning turli mintaqalaridan jangarilarni jalb qilish, ularni Afg‘oniston va Pokiston hududlariga jo‘natishni muvofiqlashtirib kelgan. Shuningdek, Altun tashkilotning propaganda ishlarida ishtirok etgan va ekstremistik g‘oyalarni tarqatishda faol rol o‘ynagan.

Turkiya maxsus xizmatlari mazkur xavfli terroristning qo‘lga tushirilishi nafaqat Turkiya va Pokiston xavfsizligi, balki butun mintaqada tinchlikni ta’minlash uchun muhim qadam ekanligini ta’kidlamoqda. Ushbu operatsiyaning muvaffaqiyatli amalga oshirilishi xalqaro terrorchilikka qarshi kurashda muhim natija sifatida baholanmoqda.

Eslatib o‘tamiz, ISHID tashkiloti jahondagi ko‘plab davlatlar va xalqaro tashkilotlar tomonidan terrorchilik tashkiloti deb e’tirof etilgan bo‘lib, uning faoliyati butun dunyo bo‘ylab qattiq nazorat qilinadi. Ushbu guruh tomonidan ko‘plab mamlakatlarda qator qonli hujumlar amalga oshirilgan.

Pokiston va Turkiya maxsus xizmatlarining ushbu yirik muvaffaqiyati, xalqaro xavfsizlik hamda terrorga qarshi kurash doirasidagi muhim voqea sifatida baholanmoqda. Terrorchilikning oldini olish va xavfsizlikni ta’minlash bo‘yicha kelajakda ham bunday hamkorlik davom ettirilishi kutilmoqda.

Foto: Anadolu