AQSh Vakillar palatasi 2026 yil uchun mudofaa byudjetini tasdiqladi. Yangi byudjet 901 milliard dollarni tashkil etib, bu avvalgi ko'rsatkichlardan rekord darajada yuqori.
Ushbu hujjat 312 nafar kongressmen tomonidan ma'qullangan bo'lib, 112 nafari unga qarshi ovoz berdi. Hozirgi kunda qonun loyihasi Senat tomonidan ko'rib chiqilmoqda va kelasi hafta tasdiqlanishi kutilmoqda.
Yangi byudjet AQSh prezidenti Donald Tramp talab qilgan summadan 8 milliard dollarga ko'proqni o'z ichiga oladi. Bu versiya Senat va Vakillar palatasi ilgari taklif etgan variantlar o'rtasidagi murosali kelishuvdir.
Har ikki partiya yetakchilari, ayrim bandlar bo'yicha kelishmovchiliklar bo'lishiga qaramay, hujjatni qo'llab-quvvatlashga chaqirdilar. Byudjet Ukrainaga har yili 400 million dollar harbiy yordam ajratishni, shuningdek, Yevropa xavfsizligini mustahkamlash choralarini ham o'z ichiga oladi.
Shuningdek, AQSh harbiylarining maoshlarini 4 foizga oshirish va harbiy bazalardagi yashash sharoitlarini yaxshilash rejalashtirilgan. Biroq, hujjatda bepushtlikni davolash sug'urtasi bo'yicha band kiritilmadi, chunki bu masalaga Vakillar palatasi spikeri Mayk Jonson qarshilik ko'rsatdi.
Shuningdek, Tramp tomonidan tanqid qilingan ba'zi dasturlar, masalan, xilma-xillik va inklyuziya bo'yicha treninglar qisqartirildi. Ushbu byudjet Pentagon dasturlarini belgilaydi, biroq mablag'ni to'g'ridan-to'g'ri ajratmaydi.
Bu uchun Kongress 2026 yil sentyabrga qadar alohida qonun qabul qilishi kerak.
Mehmon guruhidagi foydalanuvchilar ushbu nashrga izoh qoldira olmaydi.
