Rossiyaga Hindiston va Bangladeshdan migrantlar oqimi keskin oshdi
56
Rossiya hukumati 2025 yilda Hindiston va Bangladesh fuqarolariga ishlash uchun so‘nggi to‘qqiz yil ichida eng yuqori miqdorda ruxsatnomalar berdi. Rasmiy ma’lumotlarga ko‘ra, bu ko‘rsatkichlar 2017 yildan buyon qayd etilgan eng katta natija hisoblanadi.
Mutaxassislar prognoziga ko‘ra, 2030 yilga borib Rossiyada ishchi kuchi yetishmovchiligi 3 million kishidan oshib ketishi mumkin. Mazkur holat mehnat migratsiyasiga bo‘lgan ehtiyojni yanada kuchaytirmoqda.
Xususan, Rossiyada ishlash uchun 56,5 ming nafar Hindiston fuqarosiga taklif yuborilgan. Solishtirish uchun, 2024 yilda bu raqam 36,2 ming nafarni tashkil etgan edi. Shu bilan birga, Bangladeshdan kelayotgan mehnat migrantlari soni ham sezilarli oshdi: agar o‘tgan yili 2,8 ming kishi bo‘lgan bo‘lsa, joriy davrda ularning soni 9,3 ming nafarga yetdi.
Qayd etilishicha, har ikki mamlakatdan kelgan migrantlar bo‘yicha ko‘rsatkichlar oxirgi to‘qqiz yil ichida eng yuqori darajaga chiqqan.
“Zamin”ni Telegramʻda oʻqing! 
