Prezident Shavkat Mirziyoyev Toshkentdagi “Malika” bozorida soliq intizomi bilan bog‘liq holatlarga qat’iy munosabat bildirdi. Davlat rahbari bozordagi vaziyatni “qog‘ozda bir, amalda boshqa” ko‘rinishga kelib qolganini qayd etib, bu yerda tartib masalasi kechiktirib bo‘lmaydigan darajaga chiqqanini ta’kidladi.
Ma’lum qilinishicha, bozorda faoliyat yuritayotgan taxminan 1500 tadbirkorning faqat chorak qismi rasmiy ro‘yxatdan o‘tgan. Eng jiddiy tomoni — ro‘yxatdan o‘tganlarning ham 25 foizi oyiga 1 mln so‘m ham soliq to‘lamaydi.
Tekshiruvlarda yana bir og‘riqli raqam ochiqlandi: dekabr oyida plastik kartalar orqali 600 mlrd so‘m atrofida aylanma yashirilgani aniqlangan. Bu katta pul — iqtisodiyotda “ko‘rinmas” aylanma qancha ko‘p bo‘lsa, adolatli raqobat shuncha tez yemiriladi.
Shu munosabat bilan Toshkent shahridagi soliq organlari faoliyati qoniqarsiz, deb baholandi. Tekshiruv yakunlari bo‘yicha mas’ul rahbarlarga nisbatan kadrlar bo‘yicha choralar ko‘rilgani bildirildi.
Davlat pozitsiyasi ochiq: asosiy maqsad — shaffoflik, adolatli raqobat va qat’iy nazorat. Ya’ni kimdir qoidaga amal qilib ish yuritsa, ikkinchisi “aylanma yashirib” ustunlik olmasligi kerak. Bu masalada “hammaga bir xil qoida” prinsipi ishlashi shart.
“Zamin”ni Telegramʻda oʻqing!
