Ukrainaga qarshi to‘liq ko‘lamli urushni davom ettirayotgan Rossiya qo‘shinlari 21 yanvarga o‘tar kechasi yana ommaviy havo hujumi uyushtirdi. Ukraina QK Havo kuchlari ma’lumotiga ko‘ra, Qrimdan “Iskander-M” ballistik raketasi uchirilgan, shuningdek Shahed turidagi va “Gerbera” kabi boshqa turdagi jami 97 ta hujumkor dron qo‘llanilgan.
Ma’lum qilinishicha, dronlar bir necha yo‘nalishdan — Kursk, Oryol, Rostov viloyatidagi Millerovo, Krasnodar o‘lkasidagi Primorsk-Axtarsk, Qrimdagi Chauda buruni hamda Rossiya egallab olgan Donesk hududidan uchirilgan. Ularning qariyb 70 tasi Shahed turiga to‘g‘ri kelgan. Ukraina havo mudofaasi mamlakatning shimoli, janubi va sharqida 84 ta dronni urib tushirgan yoki faoliyatini bostirgan.
Ukraina Havo kuchlari qayd etishicha, ballistik raketa va 13 ta hujumkor dron 11 ta nuqtada nishonga teggan, yana bir joyda esa urib tushirilgan dron parchalari qulagan. Shu bilan birga, hujum 21 yanvar ertalab va kunduz kuni ham davom etgani bildirilgan.
Energetika tizimiga zarba oqibatlari
Ukraina Energetika vazirligi ma’lumotlariga ko‘ra, hujumlar natijasida Dnipropetrovsk, Odessa, Zaporijjya va Xarkiv viloyatlarida elektr ta’minoti qisman uzilgan. Kiyev shahri va Kiyev viloyatida esa sovuq ob-havo fondida yuzaga kelgan qo‘shimcha yuklama sabab holat hali ham og‘irligicha qolmoqda: soatbay o‘chirish jadvallari vaqtincha amal qilmayotgani aytilgan.
Energetika vaziri birinchi o‘rinbosari Artyom Nekrasov ta’kidlaganidek, ta’mirlash brigadalari hamda kommunal xizmatlar uzluksiz ishlayapti, poytaxtda “yorug‘lik va issiqlik”ni tiklash uchun boshqa viloyatlardan qo‘shimcha avariya guruhlari jalb qilingan.
Ukraina prezidenti Volodimir Zelenskiy esa doimiy zarbalar oqibatida Kiyevda taxminan 4000 ta uy isitishsiz qolganini, binolarning qariyb 60 foizida elektr ta’minoti yo‘qligini ma’lum qilgan. Shuningdek, poytaxtdan tashqari eng og‘ir vaziyat Xarkiv, Sumi, Chernixiv va Dnipropetrovsk hududlarida kuzatilayotgani aytilgan.
Odessada jabrlangan bor
Odessa viloyati harbiy ma’muriyati rahbari Oleg Kiper Telegram orqali hujum oqibatida bir kishi yaralanganini xabar qildi. Uning so‘zlariga ko‘ra, fuqarolik va sanoat infratuzilmasi zarar ko‘rgan, Odessa tumanida xususiy uy-joylarga shikast yetgan, mebel mahsulotlari saqlangan ombor binosi vayron qilingan.
Qisqasi, bu kecha ham Ukraina uchun “havo hujumi — elektr — issiqlik” zanjiri yana qaytarildi. Ammo ayni paytda havo mudofaasi faol ishlagani, ta’mirlash guruhlari tinimsiz harakatda ekani va tiklash ishlari davom etayotgani ham ochiq aytilyapti — vaziyat og‘ir, lekin tizim butunlay singani yo‘q.
“Zamin”ni Telegramʻda oʻqing!
