BMU va NAII moliya va investitsiya bo‘yicha imtihon o‘tkazdi

British Management University (BMU)da ilk bor 2025 Investment Challenge musobaqasi – CFA Level 1 imtihoni namunasi asosida ishlab chiqilgan va O‘zbekiston fond bozorining amaliyotiga moslashtirilgan o‘zaro universitetlararo tanlov o‘tkazildi. Tadbirda sakkizta universitetning har biri besh nafar yuqori kurs talabasidan iborat jamoalari qatnashdi.

Musobaqa tashkilotchisi sifatida Milliy investitsiya institutlari uyushmasi (NAII) chiqdi va unga Freedom Broker investitsiya kompaniyasi homiylik qildi. BMU prorektori Lionel Xendersonning so‘zlariga ko‘ra, tanlovning asosiy maqsadi talabalarni CFA sertifikatsiyasi uchun tayyorlash va moliya hamda investitsiya sohasidagi kasbiy imkoniyatlarga e’tiborni jalb qilishdan iborat: "Bu tadbir talabalarni CFA imtihoniga yaqin formatda sinovdan o‘tkazishga imkon beradi.

Biz iqtisodiyot o‘sishi bilan birga yuqori darajada moliya va investitsiyalar bilan ishlay oladigan professional mutaxassislarni tayyorlashni istaymiz." NAII bosh kotibi Temur Xasanovning ta’kidlashicha, tashabbus yoshlar orasida kapital bozoriga qiziqishni shakllantirishga qaratilgan: "Ko‘pchilik moliya bo‘limi bitiruvchilari bankda ish topishni o‘ylaydi. Biz esa ularga boshqa imkoniyatlar – investitsiya kompaniyalari, brokerlik faoliyati, birjalar ham borligini ko‘rsatmoqchimiz.

Agar hozir talabalarni kapital bozorining asoslariga o‘rgatsak, kelgusi avlod moliyaviy savodxonroq bo‘ladi va bozorni rivojlantira oladi." Freedom Broker bosh direktorining maslahatchisi Zafar Karimov esa talabalar uchun amaliy tajribaning ahamiyatini ta’kidladi: "Biz O‘zbekistonda nafaqat aholining moliyaviy savodxonligini oshirishga, balki kapital bozorida rivojlanishni istagan talabalar uchun imkoniyatlar yaratishga e’tibor qaratayotgan NAII va universitetlar faoliyatidan juda xursandmiz. Bunday musobaqalar kelajakdagi investorlar uchun yaxshi rag‘bat bo‘lishi mumkin, kompaniyalar esa bu bozor uchun yosh, bilimli va motivatsiyaga ega kadrlar bilan boyiydi." Tanlov formati 40 ta ko‘p tanlovli savollardan iborat individual topshiriqlarni o‘z ichiga oldi.

Savollar moliyaviy hisobotlarni tahlil qilish, aksiyalarga investitsiya qilish, korporativ emitentlar, miqdoriy usullar va iqtisodiyot kabi beshta asosiy mavzuni qamrab oldi. Shuningdek, ishtirokchilar fond bozorining tarixi va O‘zbekiston kapital bozorining xususiyatlari bo‘yicha savollarga javob berishdi.

Har bir blok 40 ballik baholandi, jamoaning maksimal natijasi esa 200 ballni tashkil etdi. Tashkilotchilar mamlakatda kapital bozorini rivojlantirish uchun talabalar va mutaxassislarni birlashtiruvchi bunday tashabbuslarni davom ettirishni rejalashtirmoqda.

“Zamin”ni Telegramʻda oʻqing!