Toshkentning Yashnobod tumanida o'lim bilan yakunlangan yo'l-transport hodisasi sodir bo'ldi. Poytaxt Yo'l harakati xavfsizligi boshqarmasi bu haqda avariya yuz berganidan uch kun o'tib ma'lum qildi — hodisa to'g'risidagi xabarlar ijtimoiy tarmoqlarda tarqala boshlaganidan keyin. Bu haqda podrobno.uz xabar beradi.
Rasmiy ma'lumotga ko'ra, YTH 31 dekabr kuni soat 21:00 da (Toshkent vaqti bilan) Mahtumquli ko'chasida yuz bergan. Ijtimoiy tarmoqlardagi xabarlarda voqea joyi atrofidagi kuzatuv kameralari ishlamagani aytilib, guvohlar qidirilgani ham qayd etilgan.
Qayd etilishicha, 24 yoshli Lacetti haydovchisi yo'lni belgilangan joydan tashqarida kesib o'tayotgan piyodani urib yuborgan. Jabrlanuvchi 1991 yilda tug'ilgan ayol bo'lgan, u olgan tan jarohatlari oqibatida voqea joyida vafot etgan. Marhumaning yaqinlari uning ikki nafar voyaga yetmagan farzandi borligini bildirgan.
Mazkur holat yuzasidan Toshkent shahar IIBB Tergov boshqarmasi Jinoyat kodeksining 266-moddasi 2-qismi bo'yicha jinoyat ishi qo'zg'atdi. Hozirda tergov harakatlari davom etmoqda.
Keyinchalik ijtimoiy tarmoqlarda videoregistratordan olingan lavha tarqaldi: unda ayol yo'lni ruxsat etilmagan joyda, svetoforning qizil chirog'ida kesib o'tgan bo'lishi mumkinligi ko'rinadi. Shuningdek, kadrlar haydovchi hodisa joyidan qochib ketmaganini ham ko'rsatadi.
“Zamin”ni Telegramʻda oʻqing!
