Manchester Siti Gvardiola davrida kamyob duranglar seriyasini qayd etdi

“Manchester Siti” navbatdagi uchrashuvini durang bilan yakunladi: bu safar “Brayton” bilan bahs 1:1 hisobida tugadi. Bu haqda euro-football.ru xabar beradi.

“Shaharliklar” birinchi bo‘lim oxirida Erling Holandning goli evaziga hisobni ochdi. Biroq 60-daqiqada Kaoru Mitoma aniq zarba bilan “chaykalar”ni qutqarib qoldi.

Shu tariqa Xosep Gvardiola jamoasi chempionatdagi uchinchi o‘yinni ketma-ket durangga keltirdi. Squawka qayd etishicha, bu holat ispaniyalik mutaxassisning murabbiylik faoliyatida bor-yo‘g‘i uchinchi marta kuzatilmoqda. Avval bunday seriya 2017 yil aprelida va 2023 yil dekabrida ro‘y bergan.

Gvardiola “Manchester Siti”ni 2016 yil yozidan beri boshqarib kelmoqda. U Angliyaga kelishidan avval “Barselona” va “Bavariya”da ishlagan. Hozirgi shartnomasi 2027 yil o‘rtalarigacha mo‘ljallangan.