Xorazmlik taniqli xonanda Gulinur 7 aprel kuni 32 yoshni qarshiladi. Vodiy va Xorazm to‘ylarining eng talabgir san’atkorlaridan biri bo‘lgan ijodkor sho‘x qo‘shiqlari bilan tanilgan bo‘lsa-da, tabiatan og‘ir-bosiq va hayotga o‘zgacha qarashga ega ekani bilan ham ajralib turadi. Uning “Jaylan”, “Kerak emas”, “Duydim axir”, “Yuragimni yaraladi”, “Jo‘ji kara” kabi qo‘shiqlari muxlislar qalbidan joy olgan.
Gulinur 1994 yil 7 aprelda Xorazm viloyati Shovot tumanida tug‘ilgan. Oilada ikkinchi farzand. San’atga 2013 yilda qadam qo‘ygan. U dastlab to‘ylarda turli qo‘shiqlarni popuri qilib ijro etib, internet orqali tanilganini eslaydi. O‘sha paytlarda ijtimoiy tarmoqlar kuchli bo‘lmagani uchun videolar va telefon raqamlar orqali o‘zini tanitgan.
U otasini o‘zining eng katta tayanchi deb biladi. Otasi unga doim qo‘llab-quvvatlash berib, “bu yo‘lni boshladingmi, oxirigacha bor” degan. Hatto “o‘g‘lim yo‘q, sen ham o‘g‘lim ham qizimsan” deb ruhlantirgan. Gulinur bugungi yutuqlarini ota-ona duosi bilan bog‘laydi.
Xonanda o‘z qarashlarida san’at va shou-biznesni ajratib ko‘radi. U Yulduz Usmonova, Ozoda Nursaidova va Ozodbek Nazarbekov ijodini haqiqiy san’at deb baholaydi, hozirgi ko‘plab yoshlarni esa ko‘proq shou-biznes yo‘nalishida deb hisoblaydi.
Gulinur san’atga pul yoki mashhurlik uchun emas, orzu va havas bilan kirganini aytadi. U katta sahnalar, muxlislar olqishi va konsert berishni bolaligidan orzu qilgan. 2016 yildan o‘z qo‘shiqlarini chiqara boshlagan, 2018 yilda ilk katta konsertlarini o‘tkazgan.
Tabiatan juda ta’sirchan ekanini ta’kidlaydi. Ba’zan oddiy gapdan ham ta’sirlanib yig‘lab yuboradi. U insonlarning holatiga ham bee’tibor bo‘la olmasligini aytadi.
Gulinurning ijodiy qarashlari ham o‘ziga xos. U hozircha asosan sho‘x qo‘shiqlar kuylayotganini, ammo kelajakda ma’noli asarlar yaratish niyati borligini bildirgan.
Shu bilan birga, u sahnada qattiqqo‘lligi bilan ham tanilgan. Bir necha holatlarda to‘ylarda janjal chiqib ketgani, hatto muxlislarga qo‘l ko‘targani haqida ham gapirgan. Uning aytishicha, sahnada intizom bo‘lishi kerak, ayniqsa hurmat chegarasi buzilganda.
Shaxsiy hayotida esa u turmush o‘rtog‘i bilan 2020 yilda tanishib, turmush qurgan. U uy ishlarini ham, sahna faoliyatini ham muvozanatda olib borayotganini aytadi. Hatto rashk tufayli ijtimoiy tarmoqlar bilan bog‘liq cheklovlar qilgani ham ma’lum.
Gulinur qimmatbaho avtomobillarga ham qiziqadi. U avval Tahoe, keyin esa Lexus xarid qilgan, otasiga ham mashina sovg‘a qilgan.
