O‘zbekistonda mehnat migratsiyasi xizmatlarini “yagona darcha” tamoyili asosida tashkil etuvchi yangi tizim yaratilmoqda. Bu haqda 18-noyabr kuni Prezident Shavkat Mirziyoyevga taqdimot o‘tkazildi.
Uchrashuvda, chet elda ishlayotgan o‘zbekistonliklar soni qisqarayotganiga qaramay, 2025-yilning dastlabki o‘n oyida pul o‘tkazmalari hajmi 15,8 milliard dollarga yetgani qayd etildi. Mehnat bozorini rivojlantirish va xizmatlarni soddalashtirish maqsadida quyidagi chora-tadbirlar rejalashtirilgani bildirildi: “Xorijda ish” platformasi orqali hozirda 25 ta onlayn xizmat taqdim etilmoqda va ulardan 520 mingdan ziyod fuqaro foydalangan.
Platformaga biometrik identifikatsiya, sun’iy intellekt, bo‘sh ish o‘rinlarini real vaqt rejimida kuzatish va masofaviy maslahat berish kabi yangi imkoniyatlarni tatbiq etish ko‘zda tutilgan. Migratsiya agentligi tarkibida 24 soatlik xizmat ko‘rsatadigan vaziyat markazini tashkil etish rejalashtirilmoqda.
Shuningdek, noqonuniy migratsiya va firibgarliklarga qarshi kurash choralari kuchaytirilishi, aeroportlarda ma’lumot beruvchi terminallar o‘rnatilishi, jarimalar oshirilishi va noqonuniy chiqishga ko‘maklashganlik uchun jinoiy javobgarlik masalasi ko‘rib chiqilishi taklif etildi. Prezident bu takliflarni ma’qullab, ularning amalga oshirilishini tezlashtirish bo‘yicha topshiriqlar berdi.
Mehmon guruhidagi foydalanuvchilar ushbu nashrga izoh qoldira olmaydi.
