O‘zbekistonda kafe, restoran, turizm va mehmonxona sohalarida xodimlarni qisqa muddatga rasmiy ishga qabul qilish imkoniyati joriy etilmoqda. Bu haqda “Kichik biznes subyektlarining o‘sishi uchun yanada qulay iqtisodiy va ma’muriy shart-sharoitlar yaratish to‘g‘risida”gi prezident farmonida belgilandi.
Hujjatga ko‘ra, 2026 yil 1 iyundan boshlab umumiy ovqatlanish xizmatlarini ko‘rsatuvchi tadbirkorlar ayrim toifadagi xodimlarni mehnat organlarining mobil ilovasi orqali soddalashtirilgan tartibda rasmiylashtira oladi. Ya’ni xodimni shu kunning o‘zida, bir kunlik yoki muayyan qisqa muddatga qonuniy ishga qabul qilish va unga ish haqi to‘lash imkoniyati paydo bo‘ladi.
Bu tartib ayniqsa kafe va restoranlar uchun qulay bo‘lishi kutilmoqda. Chunki umumiy ovqatlanish sohasida ba’zan bayram, tadbir, mavsumiy talab yoki mijozlar oqimi ko‘paygan paytlarda qo‘shimcha xodimlarga ehtiyoj tug‘iladi. Endi bunday holatlarda tadbirkor xodimni norasmiy jalb qilmasdan, tez va qonuniy tarzda rasmiylashtirishi mumkin bo‘ladi.
Soliq qo‘mitasi raisi o‘rinbosari Jahongir Abdiyev ham ushbu yangilik yuzasidan tushuntirish berdi. Uning aytishicha, umumiy ovqatlanish, turizm va mehmonxona sohalarida bir kunlik yoki bir haftalik ishga olish holatlari ko‘p uchraydi. Yangi tizim esa ana shu amaliyotni qonuniy va sodda shaklga keltiradi.
“Bunda xodimni shu kunning o‘zida, ya’ni bir kunlik ish haqi berish evaziga yoki bir haftalik ish haqi berish evaziga rasmiylashtirish imkoniyati paydo bo‘ladi”, — dedi u.
Mazkur tartib kichik biznes uchun ortiqcha byurokratiyani kamaytirish, mehnat munosabatlarini shaffoflashtirish va xodimlar huquqini himoya qilishga xizmat qilishi mumkin. Chunki rasmiylashtirilgan xodimning ish haqi, mehnat faoliyati va huquqiy maqomi aniq qayd etiladi.
Qisqasi, 2026 yil 1 iyundan kafe va restoranlar ayrim xodimlarni bir kunlik yoki bir haftalik kabi qisqa muddatga soddalashtirilgan tartibda rasmiy ishga olishi mumkin bo‘ladi. Bu biznes uchun ham, xodim uchun ham qulay: ish tez, rasmiy va “og‘zaki kelishdik-da” degan eski rejimsiz amalga oshadi.
“Zamin”ni Telegramʻda oʻqing!
