Yevropa klub futbolidagi nufuzli musobaqalardan biri sanalgan UEFA Yevropa Ligasida 1/8 final bosqichining dastlabki uchrashuvlari yakunlandi. Qizg‘in va murosasiz kurashlar bilan o‘tgan bu bahslar muxlislarga bir qator kutilmagan natijalarni ham taqdim etdi. Ayrim jamoalar o‘z maydonida ustunlikka erishgan bo‘lsa, boshqalar esa oxirgi daqiqalarda omaddan quruq qoldi.
Ispaniyada bo‘lib o‘tgan uchrashuvda "Selta" o‘z maydonida «Lion»ni qabul qildi. Uy egalari o‘yinning 25-daqiqasida Ruedaning goli orqali hisobni ochishga muvaffaq bo‘lishdi. Biroq uchrashuvning so‘nggi lahzalarida fransuz jamoasi taslim bo‘lmadi. 88-daqiqada Endrik hisobni tenglashtirib, “Lion”ni mag‘lubiyatdan qutqarib qoldi. Shu bilan birga 55-daqiqada Iglesias maydondan chetlatilib, ispan klubi o‘yinni kamchilikda davom ettirishga majbur bo‘ldi.
Selta — Lion 1:1
Gollar: Rueda (25) — Endrik (88).
Chetlatish: Iglesias (55, Selta).
Angliyadagi bahsda esa «Nottinghem Forest» o‘z maydonida Daniyaning «Midtyulland» klubiga qarshi maydonga tushdi. Mehmonlar sabr-toqat bilan hujumlar tashkil etib, 80-daqiqada Cho Hyo Son tomonidan urilgan gol orqali minimal hisobda g‘alabani qo‘lga kiritishdi.
Nottinghem Forest — Midtyulland 0:1
Gol: Cho Hyo Son (80).
Belgiyada o‘tgan uchrashuvda "Genk" Germaniyaning "Frayburg" jamoasini qabul qildi. Uy egalari o‘yinning 24-daqiqasida Al Uahdi tomonidan kiritilgan gol evaziga muhim g‘alabaga erishdi.
Genk — Frayburg 1:0
Gol: Al Uahdi (24).
Vengriyada esa "Ferensvarosh" o‘z maydonida Portugaliyaning "Braga" klubini qabul qildi. Mazkur bahsda maydon egalari ancha ishonchli harakat qildi. Kanichovski 32-daqiqada hisobni ochgan bo‘lsa, Jozef 69-daqiqada yana bir gol urib, jamoasiga 2:0 hisobidagi ishonchli ustunlikni taqdim etdi.
Ferensvarosh — Braga 2:0
Gollar: Kanichovski (32), Jozef (69).
Shu tariqa, 1/8 final bosqichining birinchi uchrashuvlari bir qator qiziqarli va kutilmagan natijalar bilan yakunlandi. Endi barcha e’tibor javob bellashuvlariga qaratilgan. Ular 19-mart kuni bo‘lib o‘tadi va aynan o‘sha o‘yinlar qaysi jamoalar keyingi bosqichga yo‘l olishini hal qiladi. Futbol muxlislari esa yanada keskin va dramatik bahslarni intizorlik bilan kutmoqda.
“Zamin”ni Telegramʻda oʻqing!
