Fallout’ning originali hammuallifi va Troika Games asoschisi Tim Keyn studiyaning Arcanum, Vampire: The Masquerade — Bloodlines hamda The Temple of Elemental Evil kabi RPG’lari nega ko‘plab baglar bilan chiqqanini tushuntirdi. Uning aytishicha, tajriba yetarli bo‘lsa-da, jarayonning o‘zi muammolarni keltirib chiqargan. Bu haqda playground.ru xabar beradi.
Keyn asosiy omil sifatida kichik jamoaning “haddan tashqari ijodiy ishtiyoqi”ni ko‘rsatadi. Natijada ishlab chiquvchilar shoshilinch tarzda murakkab o‘yin mexanikalarini ko‘p miqdorda qo‘shib yuborishgan, biroq ularni to‘liq sinovdan o‘tkazish va sozlashga ulgurishmagan.
Vaziyatni yana bir jihat og‘irlashtirgan: bu mexanikalarni yaratishga xizmat qiladigan ichki vositalarning o‘zi ham xatolarga boy, yetilmagan bo‘lgan. Keng imkoniyatlar tizimlar o‘rtasida kutilmagan “to‘qnashuvlar”ni yuzaga keltirib, yangi nosozliklarni keltirgan.
Dizayner bunday holat uchun mas’uliyat jamoa zimmasida ekanini tan oladi, shu bilan birga murakkab RPG’lar umuman olganda ko‘pincha texnik muammolar bilan chiqishini ham eslatadi.
Shunga qaramay, Troika merosi hanuz yashab kelmoqda: ularning loyihalari chuqurligi va noodatiy yondashuvi bilan esda qolgan. Oradan o‘n yillab vaqt o‘tsa ham, muxlislar patch va modlar orqali o‘yinlarni qo‘llab-quvvatlab, takomillashtirishda davom etmoqda — natijada bu nomlar kult klassikaga aylangan.
“Zamin”ni Telegramʻda oʻqing!
