Yaponiyada yilning ilk auksionida tunets 3,2 mln dollarga sotildi

Yaponiyada yil boshi an’anaviy ravishda katta qiziqish uyg‘otadigan baliq auksioni bilan boshlandi. 5 yanvar kuni o‘tkazilgan navbatdagi savdoda ko‘k tunets tarixdagi eng qimmat narxlardan biriga sotilib, yana bir rekord qayd etildi.

Ma’lumotlarga ko‘ra, og‘irligi 243 kilogrammni tashkil etgan ko‘k tunets 510 million iyenaga, ya’ni taxminan 3,2 million dollarga xarid qilingan. Ushbu baliq Yaponiyaning Aomori prefekturasi hududida tutib olingan bo‘lib, savdo natijasi 1999 yilda o‘rnatilgan avvalgi rekorddan ham oshib ketdi.

Tokiodagi Toyosu bozorida o‘tadigan yilning ilk auksionlari yapon biznes an’analarida alohida ahamiyatga ega. Mahalliy ishbilarmonlar orasida birinchi savdoda eng asosiy lotni qo‘lga kiritish omad va muvaffaqiyat ramzi, degan qarash mavjud.

Bu galgi savdoni ham mashhur Sushi Zanmai restoranlar tarmog‘iga egalik qiluvchi Kiyomura Corp. kompaniyasi yutib oldi. Kompaniya rahbari Kiyosi Kimura bu auksionlarda yillar davomida faol qatnashib keladi va doimiy ravishda yuqori narxlar taklif qilishi bilan tanilgan. Shu bois u Yaponiyada “tunets qiroli” sifatida mashhur.

Kimura jurnalistlarga bergan izohida narx bu qadar keskin oshishini kutmaganini tan oldi. U avval ham bir necha bor rekord summalar evaziga tunets sotib olgan bo‘lib, 2019 yildagi xaridi ham bozor tarixida alohida o‘rin egallagan edi.

Auksion yakunlangach, qimmatbaho tunets darhol bo‘laklanib, Sushi Zanmai restoranlari mijozlariga taqdim etildi. Ko‘plab tashrif buyuruvchilar bunday taomni yilni omad bilan boshlash belgisi, deb qabul qilishini ta’kidlamoqda.

Yaponiyada yilning ilk auksionlari nafaqat iqtisodiy, balki madaniy voqea sifatida ham qaraladi va har safar butun dunyo e’tiborini o‘ziga jalb qiladi.