U-23 Osiyo Kubogi “C” guruhi 1-tur uchrashuvlari arafasida O‘zbekiston, Livan, Koreya va Eron terma jamoalari murabbiylari ishtirokida matbuot anjumani bo‘lib o‘tdi. Anjumanda jamoalarning kayfiyati, tayyorgarlik jarayoni va birinchi uchrashuvlarga bo‘lgan yondashuvi ochiq-oydin sezildi: bu guruhda “oson o‘yin” degan tushuncha yo‘q.
O‘zbekiston yoshlar terma jamoasi nomidan bosh murabbiy Ravshan Haydarov hamda futbolchi Saidumarxon Saidnurullayev ishtirok etib, jurnalistlar savollariga javob qaytardi. Shu bilan birga, guruhdagi boshqa jamoalar ustozlari ham birinchi tur oldidan o‘z qarashlarini bildirishdi.
Koreya: “Birinchi o‘yin hal qiluvchi ahamiyatga ega”
Koreya terma jamoasi bosh murabbiyi Li Min Son Eronga qarshi dastlabki to‘qnashuv o‘ta jiddiy kechishini ta’kidladi.
Uning so‘zlariga ko‘ra, jamoa maydonda bir tan, bir jon bo‘lib harakat qilishga, bir-birini qo‘llab-quvvatlab o‘ynashga urinmoqda. Li Min Son Eronni juda kuchli raqib sifatida e’tirof etar ekan, “yutuqqa erishish uchun birinchi o‘yinga maksimal e’tibor berish shart”, degan fikrni alohida urg‘ulab o‘tdi.
Koreya ustozi guruh bahslari o‘yindan o‘yinga yanada murakkablashib borishini ham aytdi. U Eronning uchrashuvlari tahlil qilinganini, ayniqsa hujum chizig‘i kuchli va yaxshi shakllangan jamoa ekanini qayd etdi. Shu bilan birga, Koreya ham munosib javob berishi kerakligi, imkoniyat bo‘lsa hisobni birinchi bo‘lib ochish muhimligi ta’kidlandi.
Tayyorgarlik haqida gapirib, Li Min Son jamoasi turnir oldidan 6 ta o‘yin o‘tkazgani, o‘sha bahslar orqali kamchiliklarni topib, tuzatish ustida ishlaganini aytdi. Uning fikricha, jamoa ham jismoniy, ham ruhiy tomondan yetarlicha tayyor holatga kelgan.
Eron: “Raqibni hurmat qilamiz, ammo jang taklif etamiz”
Eron terma jamoasi bosh murabbiyi Omid Ravanhah avvalo mezbon tomonga minnatdorlik bildirdi va guruhda hurmatga sazovor jamoalar jam bo‘lganini aytdi. Uning ta’kidlashicha, birinchi uchrashuv — Koreyaga qarshi bahs va unga qattiq tayyorgarlik ko‘rilgan.
Ravanhah Koreyani doim kuchli jamoa bo‘lib kelganini tan oldi, biroq Eron ham o‘z rejasiga sodiq qolib, o‘yinchilar imkoniyatidan kelib chiqib harakat qilishini bildirdi. “Raqibni hurmat qilamiz, ammo jang taklif etamiz”, degan ibora Eronning maydonda passiv bo‘lmasligini anglatib turdi.
U shuningdek, guruhdagi har bir jamoa o‘z uslubiga ega ekanini, demak oldinda og‘ir to‘qnashuvlar turganini ham yashirmadi. Koreyaga qarshi bahsda eng yaxshi o‘yinni ko‘rsatish maqsad qilib qo‘yilgani aytildi.
Livan: “O‘zbekiston guruhdagi eng kuchlisi”
Livan terma jamoasi bosh murabbiyi Jamol Taha tashkilotchilik masalasida mezbonlarga rahmat aytdi va so‘nggi 10 kun davomida reja asosida tayyorgarlik olib borilganini qayd etdi. U Livan safida nafaqat mamlakat ichida, balki chetda to‘p tepadigan munosib futbolchilar borligini, muvaffaqiyat uchun imkoniyat mavjudligini bildirdi.
Jurnalistlar “O‘zbekiston Osiyoda kuchli, Livan esa musobaqada ilk bor qatnashyapti” degan mazmundagi savol berganda, Jamol Taha to‘g‘ridan to‘g‘ri tan oldi: guruhdagi eng kuchli jamoa — O‘zbekiston.
U O‘zbekistonning 2018-yilda chempion bo‘lgani, 2024-yilda esa finalga chiqqanini eslatib o‘tdi. Shu bilan birga, Livan ham “eng yaxshi o‘yinini ko‘rsatishga urinishini”, Tailandda mashg‘ulotlar o‘tkazib, keyin Saudiya Arabistoniga yetib kelganini aytdi. “Mutlaqo imkonsiz narsa yo‘q”, degan ishonch ham anjumanda yangradi.
Taha tayyorgarlik uchun vaqt oz bo‘lganini ham yashirmadi, biroq murabbiylar futbolchilarning imkoniyatini yaxshi bilgani, jamoa o‘zini ko‘rsatishga urinishini ta’kidladi.
O‘zbekiston: ishonch bor, maqsad — yuqori natija
O‘zbekiston U-23 terma jamoasi bosh murabbiyi Ravshan Haydarov anjumanda avvalo musobaqada ishtirok etishdan xursand ekanini aytdi. U tashkilotchilik darajasi yuqoriligini qayd etib, OFK va mahalliy tashkiliy qo‘mitaga minnatdorchilik bildirdi hamda barcha jamoalarga omad tiladi.
Haydarovning fikricha, guruhda kuchli jamoalar to‘plangan: ularning tajribasi va imkoniyatlari ma’lum. Shunga qaramay, jamoa yosh tarkib bilan ishtirok etayotgan bo‘lsa ham, murabbiy o‘z shogirdlariga ishonadi. U futbolchilar bilan suhbatda ushbu turnir ular uchun “ko‘prik” vazifasini o‘tashini ham aytib o‘tgan.
Saidumarxon Saidnurullayev esa tayyorgarlik jarayoni yaxshi o‘tganini ta’kidladi: avval Toshkentda, keyin Qatarda yig‘in bo‘lgan, adaptatsiya yetarli darajada kechgan. Uning so‘zlariga ko‘ra, asosiy maqsad — musobaqada munosib ishtirok etish va yuqori natija qayd etish.
Xulosa shu: “C” guruhi haqiqiy tekshiruv maydoniga o‘xshayapti. Koreya birinchi o‘yinni hal qiluvchi deb bilayapti, Eron “jang” kayfiyatida, Livan O‘zbekistonni guruh favoriti sifatida ochiq tan oldi, O‘zbekiston esa ishonch va maqsad bilan turnirga kirib kelyapti. Endi hammasini maydon hal qiladi — gap ko‘p, ammo 90 daqiqa hammasini joyiga qo‘yadi.
“Zamin”ni Telegramʻda oʻqing!
